Хан-Уул дүүргийн хоёрдугаар хороо тоглоомын талбайтай боллоо
НИТХ-ын төлөөлөгч Ё.Цацралтуяагийн санаачилгаар Хан-Уул дүүргийн хоёрдугаар хорооны 10 дугаар байрны хажууд тоглоомын талбай ашиглалтад орлоо. Тус байр 69 өрхтэй, 340 хүүхэдтэй. Гэвч ойр хавьд хүүхдийн тоглоомын талбайн тохижилттой газар байгаагүй аж.
Харин байрны СӨХ-той зөвшилцсөний үндсэнд НИТХ-ын төлөөлөгч Ё.Цацралтуяа Нийслэлийн орон нутгийн хөгжлийн сангийн хөрөнгөөр хийх ажилд санал оруулж уг ажлыг “Бодь Хангай” компаниар гүйцэтгүүлсэн байна. Гүйцэтгэгч компани зургийн дагуу тоглоомын талбайн тохижилтын ажлыг гүйцэтгэснээс гадна өөрсдийн санаачилгаар зурагт тусгагдаагүй, хажуугийн 150 мкв талбайг тохижуулсан байна.
Талбайг хүлээн авах комиссын ахлагч, Нийслэлийн хөрөнгө оруулалтын газрын барилгын хяналтын инженер Г.Дэлгэрсайхан уг тоглоомын талбайг бусад тоглоомын талбайтай харьцуулахад харьцангуй бага зардлаар аятайхан тохижуулсныг онцолж, ашиглалтад оруулахаар шийдвэрлэснийг тэмдэглэлээ.
