Лос Анжелес Клипперс өнгөрсөн зун Крис Полыг Хьюстен Рокетс руу солилцоогоор явуулсан билээ. Патрик Бэвэрли, Данило Галинари зэрэг түлхүүр тоглогчид бэртэл гэмтлийн улмаас улирлын ихэнх тоглолтод оролцоогүй. Мөн өнгөрсөн 2 дугаар сард солилцооны цонх хаагдахын өмнөхөн Блэйк Гриффинийг Дэтройт Пистонс баг руу явуулсан.
Хоёр ч бүх одод тоглогчоо алдаж, бэртэл гэмтэлд нэрвэгдсэн хэдий ч Клипперс баг улирал дуустал плэйоффын байрлалын төлөө хүчтэй өрсөлдөөн үзүүлсэн билээ.
Улмаар Клипперс багийн удирдлага өнгөрсөн улирал сайн ажилласан Док Риверстэй гэрээгээ сунгахаар ярилцаж эхэлсэн байна. Риверсийн Клипперс багтай байгуулсан 5 жилийн гэрээ 2019 онд дуусах юм. Талууд гэрээний сунгалтын талаар албан ёсоор мэдэгдэл хийгээгүй. Гэсэн ч талууд одоогийн хамтын ажиллагаандаа сэтгэл хангалуун байгаа гэдгээ өмнө нь удаа дараа мэдэгдэж байсан. Тиймээс Риверс өөр багийг дасгалжуулах магадлал тун бага байгаа юм.