Авлигатай Тэмцэх Газрын санаачилгаар "Эрүүгийн хэрэг дэх эрх зүйн харилцан туслалцаа-хамтын ажиллагаа" сэдэвт хэлэлцүүлэг өнөөдөр боллоо.
Энэ үеэр АТГ-ын дарга Х.Энхжаргалаас цаг үеийн асуудлаар тодруулга авлаа.
-Офшор бүсэд данс эзэмшдэг бол энэ талаараа мэдүүлэх сүүлийн хугацаа дөрөвдүгээр сарын 06-нд дууссан. Энэ талаар мэдээлэл өгөхгүй юу?
-Офшор бүсэд байгаа хөрөнгийн талаар дөрвөн хүн манайд мэдүүлгээ өгсөн. Илүү дэлгэрэнгүй мэдээлэл удахгүй тавигдана.
-Офшор бүсээс хөрөнгөө оруулж ирээгүй хүмүүст ямар арга хэмжээ авах вэ?
-Офшор бүсээс хөрөнгөө оруулж ирээгүй хүмүүсийг хуульд юу гэж заасан байна тэрүүгээр нь шийтгэнэ. Бид бололцоот бүх шалгалтуудыг хуулийн дагуу явуулж байгаа.
-Та хууль зүйн байнгын хорооны хурал дээр офшор бүстэй холбоотой асуудлаар 29 хүнийг шалгаж байна гэсэн?
-Энэ асуудлаар олон хүнийг шалгаж байгаа. Эрүүгийн хэрэг явагдаж байгаа учраас прокурорын зөвшөөрөлгүй ямар нэгэн мэдээлэл өгөх боломжгүй.
-Ерөнхийлөгч таныг ажлаа хийхгүй байна гэсэн шүүмжлэл хэлээд байгаа. Энэ тал дээр та ямар бодолтой байна?
-Хуулийн байгууллага хуулийн дагуу ажлаа явуулж байгаа. Хэн юу гэж дүгнэх нь тэр хүмүүсийн асуудал.
-Таны бүрэн эрхийн хугацаа дууссан талаар мэдээлэл гараад байна?
-Мэдэхгүй. Хар дээр цагаанаар биччихсэн байгаа. Хууль зохиодог, хуульч хүмүүс яаж ойлгох нь тэдний асуудал.