СУДАЛГАА: Иргэдийн 70% улстөрийн намыг дэмжихгүй, 41% нь Ерөнхийлөгчийн засаглалыг хүсэмжилж эхэллээ!
МЭК ХХК нь ямар нэгэн нам, байгууллага, хувь хүний захиалгаар бус, өөрийн санхүүжилтээр сар бүр тогтмол иргэдээс нийгэм, улстөрийн холбогдолтой асуудлаарх судалгааг явуулж байна.
Хамгийн сүүлийн буюу нэгдүгээр сарын судалгааны дүн мэдээ гарсан байна.
Нэгдүгээр сарын судалгааг Улаанбаатар хотод оршин суудаг сонгуулийн насны 750 иргэнээс 2018 оны 01-р сарын 17-20-ны өдөр квотчилсон санамсаргүй түүврийн аргачлалаар түүвэрлэж цуглуулжээ.
Энэхүү судалгааны хамгийн сонихол татам хэсэг бол иргэд аль нэг улстөрийн намыг дэмждэг байдал эрс буурч байгаа явдал юм.
Тодруулбал, аль ч намыг голчилдоггүй иргэд хагас жилийн өмнө 28 хувь байсан бол 2018 оны нэгдүгээр сарын байдлаар огцом нэмэгдэж 70 хувьд хүрээд байна.
График 1, Иргэдийн дэмжиж буй улстөрийн нам
Мөн Монгол Улсад ямар засаглал илүүтэй тохирох талаарх иргэдийн байр суурийг харвал 41 хувь нь буюу дийлэнх нь Ерөнхийлөгчийн засаглалтай, 31 хувь нь одоогийн засаглалын хэлбэрийг илүүд үзжээ.
График 2, Монгол Улсад тохирох засаглал,
Түүнчлэн сүүлийн үед идэвхтэй яригдаж байгаа УИХ-ын гишүүнийг эгүүлэн татах асуудалд иргэдийн олонх буюу 63 хувь нь гишүүнийг эгүүлэн татах боломжтой байх ёстойг дэмжжээ.
График 3, УИХ-ын гишүүнийг эгүүлэн татах боломжтой болох талаарх иргэдийн байр суурь,
