Банкнаас бусад санхүүгийн салбараас авсан зээл 32.3 хувиар өсчээ
Санхүүгийн Зохицуулах Хорооноос өнөөдөр банкнаас бусад санхүүгийн салбарын 2017 оны III улирлын статистикийг танилцууллаа. Монголд нийт зах зээлийн 95 хувь нь арилжааны банкуудад, 5 хувь нь бусад санхүүгийн салбарт харьяалагдаж байна.
СЗХ-ны Судалгаа, эрсдлийн шинжилгээний хэлтсийн дарга н.Хүдэрчулууны мэдээлснээр “Сүүлийн таван жил буураад буй Хөрөнгийн зах зээлийн үнэлгээ энэ оны III улиралд сэргэж өмнөх үетэй харьцуулахад 695.5 тэрбум төгрөгөөр өсөж, 2 их наяд 83.1 тэрбум төгрөгт хүрлээ. Уг өсөлтөд үндэсний томоохон компаниудын үнийн өсөлт голчлон нөлөөлсөн байна. Монголын Хөрөнгийн Биржийн Топ-20 индекс өмнөх оны мөн үетэй харьцуулахад 60 хувь өссөн бол MSE All индекс 29 хувиар өсжээ. Тайлант улиралд хоёр компани IPO гаргаж, нэг компани бонд гаргасан. Энэ нь манай Хөрөнгийн зах зээл дэх хөрөнгө оруулагчдын итгэл сэргэж, шинэ бүтээгдэхүүний хэрэгцээ өндөр байгааг харуулсан үйл явдал боллоо” гэв.
Салбарын өсөлтийн талаар Үнэт цаасны газрын дарга Б.Лхагвасүрэн “Өнгөрсөн жил ББСБ-уудын хувь нийлүүлсэн хөрөнгийн доод хэмжээг 2.5 тэрбум төгрөг болгож тогтоосон. Энэ шийдвэрийг гаргахаас өмнө хийгдэж байсан судалгаануудын үр дүн тайланд илэрч байна. Компаниудын шинээр гаргасан хувьцааны өсөлт бас нөлөөлж буй. Тухайлбал хүсэлт нь 180-280 гаруй хувиар давж биелсэн байна” гэсэн юм.
Санхүүгийн Зохицуулах Хорооноос банкнаас бусад санхүүгийн салбаруудад бүгдэд нь өсөлт гарсныг онцолж байв.
