Уншиж байна ...
ХУУЧИРСАН МЭДЭЭ: 2017/11/04-НД НИЙТЛЭГДСЭН

ШИНЭ: Өөрийгөө болон гэр бүлээ халамжлах ном

МОНСУДАР
2017 оны 11 сарын 4
Монсудар
 

Орчин үеийн хотжилт, суурин амьдралын хэв маяг нийгмийн амьдралд олон шинэ дэвшлүүдийг авчирсан хэдий ч тэр хэрээрээ урьд өмнө бидний сонсож, дуулж байгаагүй сөрөг зүйлсийг мөн өөртөө багтааж байна.

Хүн амын хэт төвлөрөлт, нийгмийн стресс бухимдал, эдийн засгийн тогтворгүй байдал, нийгмийг хамарсан олон томоохон асуудлууд хүмүүсийн сэтгэл зүйд өдөр ирэх бүр хүндээр нөлөөлж байгаа энэ цаг үед нийгмийн гишүүн бүр өөрийнхөө биеийн эрүүл мэндэд санаа зовнидогтой нэгэн адилаар сэтгэл зүйн эрүүл мэнддээ анхаарал хандуулах цаг иржээ.

2015 онд гаргасан нийгмийн хөгжлийн индексээр 100,000 хүнд ноогдох амиа хорлолтын түвшнээр манай улс 48-т жагсаж байна. Сүүлийн үед өсвөр насны хүүхэд залуучуудын амиа хорлолтын талаарх мэдээлэл хэвлэл мэдээллийн хэрэгслээр дамжуулан олны сонорт хүрч, аюулын харанга дэлдээд байгаа билээ.

Амиа егүүтгэн нас барсан хүмүүсийн ихэнх нь ямар нэг хэмжээгээр сэтгэцийн эмгэгт өртсөн байдаг. Сэтгэл гутрал нь амиа хорлолттой холбоотой хамгийн түгээмэл сэтгэцийн эмгэг юм. Тийм ч учраас сэтгэцийн ямарваа нэгэн эмгэгт өөрийгөө өртсөн хэмээн таамаглаж байгаа хүмүүс өөрт тохиолдож буй сэтгэл зүйн асуудлыг зайлшгүй мэргэжлийн хүмүүстэй ярилцан, эмчлэх шаардлагатай.

Өндөр хөгжилтэй улс орны иргэд шаардлагатай үед сэтгэл зүйн туслалцаа зөвлөгөө авах нөхцөл боломжоор хангагдсан байдаг бөгөөд иргэд нь ч энэ өвчний талаар хангалттай эрүүл мэндийн боловсролыг олж авсан байдаг. Харин манай орны хувьд энэ нөхцөл төдийлөн хангалттай бүрэлдэн тогтож чадаагүй байна.

Иргэд сэтгэлзүйн эрүүл мэндтэй холбоотой төрөл бүрийн мэдээлэл ( жишээ нь: хүүхдийн хүмүүжил, харилцааны асуудал, сэтгэл гутрал, түгшүүр гэх мэт) авах шаардлага, хүсэл их байдаг ч энэ талаарх баталгаатай мэдээллийн эх сурвалж манай орны хэмжээнд тун хомс байгаатай хүн бүхэн санал нийлэх байх.

Энэхүү ном нь нийгэмд шаардлагатай байгаа сэтгэлзүйн боловсролын талаарх үндсэн ойлголтыг хүмүүст түгээх, уншигчдад өөрийгөө халамжлах, түгээмэл тохиолддог сэтгэцийн эмгэгээс урьдчилан сэргийлэх, эрт үед нь илрүүлэх зорилгоор бичигдсэн нэмэлт лавлагаа бүхий мэдээллүүдийг багтаасан цогц гарын авлага юм.

Ном нийт 10 бүлгээс бүрдэх бөгөөд бүлэг бүр сэтгэл зүйн эмгэгүүдийн талаарх ерөнхий ойлголт, үүсэх хүчин зүйлс, тухайн эмгэгийг илтгэх шинж тэмдгүүд, эмгэгийг эмчлэх арга замууд, асуудлыг шийдвэрлэх хэсэг гэсэн бүрдлүүдээс тогтох бөгөөд уншигч зөвхөн уншаад өнгөрөх төдий бус өөрт буй сэтгэл зүйн эмгэгийг танин мэдэх, тухайн эмгэгийг эмчлэх ерөнхий арга замын тухай ойлголттой болж чадах ажээ.

Сэтгэлзүйн боловсролоо дээшлүүлэх, өөрийгөө болон гэр бүлээ халамжлахад суралцах хүсэлтэй бүхий л хүн энэхүү номыг гарын авлага хэлбэрээр ашиглахад тун тохиромжтой бөгөөд Интерном номын дэлгүүрийн бүх салбараар худалдаалагдаж байна.