Ерөнхийлөгч Х.Баттулга төгссөн сургуулийнхаа гадаа мод тарилаа

Өнөөдөр мод тарих үндэсний өдөр. Монгол Улсын Ерөнхийлөгч Х.Баттулга өнөөдөр өөрийн суралцаж төгссөн Хан-Уул дүүргийн 34 дүгээр сургуулийн орчинд мод тарилаа.

Нийслэлийн Хан-Уул дүүргийн 34-р сургуулийн захирал Р.Өлзийхишиг Ерөнхийлөгч Х.Баттулгыг өөрийнхөө төрөлх сургуулийг зорин ирж ийнхүү сурагч багш нарыг нь мод тарих үйлд уриалж байгаад талархал илэрхийлээд сургуулийнхаа урд цэцэрлэгт талбайг арчлан тордож тарьсан мод бүрээ ургуулахын төлөө ажиллана хэмээн хэлсэн юм. 

Ерөнхийлөгч Х.Баттулга төрөлх сургуулийнхаа багш оюутнуудад сурлага, ажил хөдөлмөрийн амжилт хүсээд дэлхийн дулаарал, цөлжилтийг бууруулахын тулд хүн бүр мод тарих, тарьсан модоо арчилж ургуулахын ач холбогдлыг санууллаа.

Мөн тэрээр хавар, намарт ийнхүү мод тарих өдөртэй болж, зохион байгуулалттайгаар мод тарьж эхэлснээс хойш 9 сая гаруй мод тарьснаас 6 сая гаруй нь ургасан тоо баримт байгааг дурдаад, тарьсан мод бүрээ ургуулахад анхаарах хэрэгтэйг сурагчдад дахин дахин сануулав. 

Мод тарих үйл ажиллагаанд Ерөнхийлөгчийн Тамгын газрын дарга З.Энхболд, 34-р сургуулийн ахлах ангийн 100 гаруй сурагчид, багш, эцэг эхчүүдийн төлөөлөл, ангийн зарим нөхөд нь ирж оролцлоо. 

Эх сурвалж: Ерөнхийлөгчийн ХМА