2020 оны 11 сарын 30
Эдийн засгийн гурав дахь том хямралыг эмэгтэйчүүд давж чадах уу? Урт удаан хугацааны асар их хүчин чармайлтаар ядуурлаас гарч чадсан мянга мянган эмэгтэйчүүд дахин “ангал” руу унах аюул тулж ирээд байна. Цар тахлаас урьдчилан сэргийлэх хатуу хөл хорионы дэглэмээс үүдэн эмэгтэйчүүд голлон ажилладаг жижиг дунд үйлдвэрлэлийн салбарын “амь” дээсэн дөрөөн дээр дэнжгэнэж байна. Нийт аж ахуйн нэгжийн 98 хувийг, ДНБ-ний 25 хувийг бүрдүүлж, ажиллах хүчний тал хувийг ажлын байраар хангаж буй ЖДҮ эрхлэгчдийн 64 хувийг эмэгтэйчүүд эзэмшдэг. Мөн цар тахлаас үүдэлтэй үйл ажиллагаа нь хамгийн ихээр доголдсон бөөний болон жижиглэн худалдаа, зочид буудал, нийтийн хоолны үйлчилгээ, боловсрол зэрэг салбарт ажиллагсдын дийлэнх нь буюу 65-73% нь эмэгтэйчүүд байна.