ГУРВАН СОНГУУЛЬ ДАВАВ

УИХ-ын сонгуулийн өмнөхөн буюу 2016 оны тавдугаар сарын 5-нд Сонгуулийн тухай хуульд өөрчлөлт оруулснаар 2016 оны УИХ-ын сонгууль тус бүр нэг мандаттай 76 тойргийн зарчмаар явагдахаар болов. 

Энэ удаагийн сонгуулийн бас нэгэн онцлог нь аймаг, нийслэлийн сонгууль зэрэг явагдсан бөгөөд УИХ-ын сонгуульд 12 нам, гурван эвсэл, бие даагч нийт 498 нэр дэвшигч өрсөлдсөн байна. Мөн энэ сонгуульд хамгийн олон буюу 69-н бие даагч бүртгүүлсэн нь бас нэгэн онцлог байв. Ингээд МАН 65, АН 9, МАХН 1, бие даагч 1 гэсэн харьцаатай сонгуулийн эцсийн дүн гарав.

Нийслэлийн ИТХ-д 286 нэр дэвшигч 45 тойрогт өрсөлджээ. Үүнээс МАН 34, АН 11 тойрогт ялалт байгуулсан байна.

Аравдугаар сарын 19-нд товлогдсон орон нутгийн сонгуульд АН-ынхан найдвар тавьж байсан ч өмнөх сонгуулиас дорвитой өөрчлөлт гарсангүй. Нийт 21 аймаг, 330 сум, 9 дүүргийн 104 сум, 2 аймаг, 3 дүүрэгт ялалт байгуулсан юм. 

АН ЯЛАГДЛЫН БОДИТ ШАЛТГААНАА ХҮЛЭЭН ЗӨВШӨӨРЧ ЧАДАХ УУ

Хамгийн сүүлд Их хурлаа хэзээ хийсэн нь тодорхойгүй, намын ажилтнууд нь хүртэл барин тавин хугацаа хэлдэг байсан АН-ынхан удаан хүлээлгэсэн VI Их хурлаа арванхоёрдугаар сарын 6, 7-нд албан ёсоор хийв. 

Энэ Их хурлаас намын даргын асуудлыг хэлэлцэхгүй нь тодорхой болсон тул гол хүлээлт үндсэн дүрмийн шинэчлэл байв. Гэвч намын даргын “Хоёрхон өдөрт 1,210-хан хүн намын шинэчлэлийг хийх боломжгүй байлаа” гэсэн тайлбартайгаар дүрмийн шинэчлэлийг батлахаа хойшлуулаад байгаа юм. 

Их хурлаас олон нийтийн хүлээсэн шиг дорвитой өөрчлөлт гараагүй ч хамгийн чухал нь “АН амьд байгаа шүү” гэсэн мессэж байв. Мөн тэд өөрсдийн ялагдлын шалтгаанаа бодитоор дүгнэж хүлээн зөвшөөрөв үү гэх асуултын тэмдэг хариултаа олж чадсангүй бололтой...

УЛС ТӨРИЙН ОЛИМП МОНГОЛД 

Ази, Европын 50 гаруй улсын төрийн өндөр дээд хэмжээний зочдыг хүлээн авсан 11 дэх удаагийн АСЕМ-ийн уулзалт Монголд амжилттай зохион байгуулагдлаа. 

Долоодугаар сарын 15-16-нд буюу хоёр өдрийн турш үргэлжилсэн уг арга хэмжээний үеэр нэгдсэн хоёр хурал, бэсрэг наадам болсон юм. 

АСЕМ-ийн уулзалтыг дагасан сайн, муу олон мэдээлэл гарсан ч Монголчууд улс төрийн олимп гэгддэг томоохон арга хэмжээг амжилттай зохион байгуулж чадсан билээ. 

АСЕМ-ийн дээд хэмжээний уулзалтыг зохион байгуулахад 21 тэрбум төгрөгийг зарцуулав. 

X БОГД МОНГОЛД МЭНДЭЛЧИХСЭН ШИНЖ ТЭМДЭГ ИЛЭРСЭН

Дээрхийн гэгээнтэн XIV Далай лам арваннэгдүгээр сарын 18-21-ний өдрүүдэд манай улсад айлчилсан. Энэ нь түүний Монголд хийсэн ес дэх айлчлал байв. 

Түүний айлчлалыг Гандантэгчинлэн хийдээс цэвэр шашны зорилготой гэдгийг онцолсон ч уг айлчлалыг эсэргүүцэж байсан БНХАУ манай улстай хийхээр төлөвлөөд байсан дөрвөн ч уулзалтаа тодорхойгүй хугацаагаар хойшлуулаад байна.

XIV Далай лам айлчлалынхаа төгсгөлд "X Богд Монголд мэндэлчихсэн байгаа шинж тэмдэг илэрч байна. Одоогоор нарийн тодруулах үйл явц, мэдээллийг хэлэх боломжгүй. Хүүхэд их жаахан байгаа. Тэгэхээр том болохоор нь тодорхой хэлж болно" хэмээгээд буцсан юм.

МОНГОЛЧУУД ТАТВАРАА ТӨЛЖ, АЗТАН БОЛСООР...

Монголчууд анх удаа төлсөн татвараасаа тодорхой хувийг эргүүлэн авахаар тусгасан НӨАТ-ын тухай хуулийн шинэчилсэн найруулга 2016 оны нэгдүгээр сарын 1-нээс хэрэгжиж эхлэв. 

Хуулийн хэрэгжилтийн хүрээнд иргэд сугалаатай баримтаар сар бүр азаа үзэж, хамгийн сүүлд хоёр ч залуу 100 сая төгрөгийн эзэн болжээ. 

НӨАТ-ын бүртгэлийг ийнхүү сайжруулснаар далд эдийн засагт эргэлдэж буй хэдэн тэрбум мөнгөнөөс төр татвар авч, эдийн засгийнхаа хүчин чадлыг бодитоор тооцох боломжтой болох юм. 

ЧИНГИС ХААНЫ ЗУРАГТАЙ МОНГОЛ ТӨГРӨГ “ОД” БОЛОВ

Монгол төгрөг дэлхийн хамгийн сул валютаар нэрлэгдэж, Чингис хааны зурагтай 20 мянган төгрөг дэлхийн хэвлэлээр од болов. 

Арваннэгдүгээр сарын 10-ны өдөр хүлээлтээс үүдсэн шок төгрөгийн ханшид хөөсрөлт үүсгэж ам.доллартай харьцах ханш нь өдөрт 100 гаруй төгрөгөөр огцом унасан юм. 

Энэ жилийн хувьд төгрөгийн ханшийн сулрал УИХ-ын сонгуулиас хойш эрчтэй мэдрэгдэж, хагас жилийн дотор 40 орчим хувиар унаад байна. 

МОНГОЛЫГ СУДЛАГЧИД НЭМЭГДСЭЭР...

Олон Улсын Mонголч Эрдэмтний Их Хурал 11 дэх удаагаа Монгол Улсын Ерөнхийлөгчийн ивээл дор 2016 оны наймдугаар сарын 15-наас 18-ны өдрүүдэд зохион байгуулагдав. 

Таван жил тутамд зохион байгуулагддаг уг хурлын анхны чуулган 1959 оны есдүгээр сард болж байсан түүхтэй бөгөөд энэ удаагийн чуулганд дэлхийн 29 орны 400 гаруй эрдэмтэн судлаачид оролцож, “Монгол хэл бичиг судлал”, “Монголын түүх судлал”, “Монголын соёл, утга зохиол судлал”, “Монголын нийгэм, эдийн засгийн судлал”, “Монголын гадаад харилцаа судлал” гэсэн таван салбарын хүрээнд хуралдсан юм.

Тус хуралдаанд оролцогчид жил ирэх бүр өсөн нэмэгдэж, Монголчуудыг сонирхон судлагч эрдэмтэн судлаач өдөр ирэх тусам олширч байгааг тод томруун харуулж байна.  

ОЛИМПИЙН МӨНГӨН МЕДАЛЬ

Зуны олимпийн 31-р наадам Рио де Жанейро хотноо наймдугаар сарын 5-21-нд явагдаж өндөрлөсөн.

Манай улсын хувьд түүхэндээ байгаагүй хамгийн өргөн бүрэлдэхүүнтэй буюу 43 тамирчинтай энэ наадамд өрсөлдөж, жүдо бөхийн 57 кг-ын жинд Д.Сумъяа мөнгө, боксын 60 кг-ын жинд Д.Отгондалай хүрэл медаль хүртсэн. Ингээд багийн дүнгээр Монгол Улс 206 орноос 67-р байрт бичигдсэн юм.

Харин есдүгээр сарын 7-нд эхэлсэн паралимпд манай улсаас спортын таван төрөлд найман тамирчин оролцож, паурлифтингийн 88 кг-ын жинд Э.Содномпилжээ хүрэл, жүдо бөхийн 60 кг-ын жинд Б.Ууганхүү мөн хүрэл медаль тус тус хүртсэн нь энэ жилийн спортын салбарын онцлох үйл явдал болж байна.