Өнөөгийн залуусын “мөрөөдөл” болчихоод байгаа орон сууцтай болох их аянд сэтгүүлч миний бие “мордоод” хоёр сарын хугацааг үзжээ. Хувийн хэвшлийн салбарт тав, зургаан жил ажилласан, ханьтайгаа гэр бүлээ батлуулаад тийм ч олон жил болоогүй залуу гэр бүлийн хувьд байртай болох тэр тусмаа найман хувийн зээлд хамрагдах гэдэг бүтэшгүй мөрөөдөл гэдгийг энэ хоёр сарын хугацаанд яс махандаа шингэтэл ойлгож байна.
Зээлийн эдийн засагчийн хүссэн материалыг цуглуулахын тулд бүтэн долоо хоногийн ажлаа таслах бол хамгийн богино хугацаа. Нэг бичиг авчрахад болохгүй гэсэн хариулт сонсоно.
Хэрвээ аль нэг банкинд таньдаг эдийн засагч, эсвэл ахиухан мөнгө аваад тэндээсээ хоёр гурван сая төгрөг атгуулчихвал зээл хамгийн хурднаар буюу 14 хоногт л багтаад гарчихдаг гэсэн танилынхаа зөвлөгөөг дагасан ч тусыг эс олов. Бидний хүссэн зээлийн хэмжээ 61 сая төгрөг.
Метр квадрат нь 1,650,000 мянган төгрөгийн үнэтэй байранд 53.09 метр хоёр өрөө байранд санаархсан хэрэг.
Зээлийн эдийн засагчийн хүссэн материалыг цуглуулахын тулд бүтэн долоо хоногийн ажлаа таслах бол хамгийн богино хугацаа.
Урьдчилгаа 26 саяыг төлөөд 61 сая дээр байрны зээл хүссэн ч 20 жилийн хугацаанд нөхөр бид хоёрын мөнгө төлж хүчрэхгүй гэдэг шалтгаанаар ийнхүү байртай болох мөрөөдөл маань салхинд хийссэн юм. Энэ хариултыг авах гэж дээр хэлсэнчлэн хоёр сарын хугацааг алдсан. Эхлээд бичиг баримтаа бүрдүүлнэ.
Хөдөлмөрийн гэрээнээс эхлээд бүх бичгээ бүрдүүлсний дараа хамгийн том шалгуур болох 30 хувиа хаанаас хэрхэн бүрдүүлснээ батлах нэг шалгуур дээр ирээд л дахиад 10 хонох нь наад захын асуудал. Ах дүү амраг саднаасаа бэлэглэлийн гэрээгээр авсан бол тус бүрээс нь гарын үсэг, өргөдөл цуглуулж нотариатаар баталгаажуулна. Гадаадад ажиллаж амьдардаг ах дүүгээсээ авсан бол мөн л тухайн хүний гарын үсэгтэй бичгийг ирэхийг хүлээсээр цаг алдана. Мал зарсан бол түүнийгээ баталгаажуулах ченжийн бичиг гэх мэт “тэнэг” баримт бүрдүүлнэ.
Зарим нь энэ бүхнийг хуурамчаар үйлдэж, найман хувийн зээлд хамрагдахын тулд банкнаас зээл авахааргүй баян гэдгээ хуурамчаар нотолж хамаг цагаа барж байгаа юм. Ийнхүү арилжааны банкны өндөр шалгуурт бүдэрсэн над мэтийн олон залууст гэрэлтэй нэг мэдээ дуулдсан нь урьдчилгаа төлбөрийг 10 хувь болгох тухай яриа.
Засгийн газар, Барилга хот байгуулалтын яамтай хамтран урьдчилгаа төлбөрийг 10 хувь болгох ажил эхлүүлснээ зарлахад ёстой л бүрхэг тэнгэрт нар гарах шиг болж билээ. Үнэхээр тийм зүйл болдог бол гэсэн итгэлийн оч дахиад л төрж эхэлсэн.
Анх мэдээг нь дуулсан даруйдаа л хөл алдан ханьдаа дуулгаж хамтдаа гэгэлзэв. Байрныхаа зээлийг эгээ л бүтээчихсэн аятай хаана ямар тавилга тавихаа ярилцсаар өнөөх байрныхаа хүнтэй дахин ярилаа. Гэтэл хэлсэн үгийг нь сонсоод ёстой чихэндээ итгэсэнгүй. Таны зээл бүтэхгүй ээ гэсэн хариултыг банкнаас дуулахын өмнөхөн л 1,650,000 байсан орон сууц маань 10 хувийн дуулианаар метр квадрат тутамдаа 50,000 төгрөг нэмчихжээ. Ингэснээр нэг сая 700,000 мянгаар 53.09 метр квадрат байр авах нөхцөлтэй тулгарав. Нийлээд 91 сая төгрөг.
Тэндээс урьдчилгаа 10 хувийг нь төлөөд цаана нь 81 сая төгрөгөөр байрны зээлд орно гэсэн үг. 61 сая төгрөг авах гэж шалгуурт нь бүдэрсэн бидэнд 81 сая гэдэг ёстой л үүлгүй тэнгэрт аянга ниргэх шиг дуулдах нь тодорхой. Ийм жишээ маш олон хүний амьдралд тохиолдож байгаа. Хувийн хэвшилд ажилладаг, төрийн албан хаагчид шиг нэмэгдэл цалин гэж байхгүй мань мэтийн залуусын хувьд найман хувийн зээл мөрөөдөл хэвээр үлдэх нь ээ.
Мэдээж энд арилжааны банкуудаас гадна төр өөрөө буруутай. Хэрвээ банкуудтайгаа ярилцаж тохироод, 10 хувь болгох боломжтой гэдгээ яг таг тогтчихоод зарласан бол ингэж нэмэгдэх үү гэдгийг эрхэм Барилгын сайд Д.Цогтбаатар ойлгоно гэж найдъя. Арилжааны банк ашгийн төлөө байгууллага. Тиймдээ ч төр дарамтлахаар “айгаад” 10 хувийг нь төлүүлээд сарын орлого нь нэг сая төгрөгт эргэлддэг залууст 81 сая төгрөг 20 жилд зүгээр өгөөд явуулчихгүй.
Тиймээс 10 хувь болгочихвол бид шалгуураа өндөр тавина гэсэн “шантааж” тэднээс ирж эхэлжээ. Тухайлбал, 10 хувийн урьдчилгаанд орох байр нь 55 метр квадрат хүртэл байх, Засгийн газар батлан даасан тохиолдолд зээл хүсэгчийн насыг улам багасгаж 40-өөс доошоо тогтоох зэрэг нэлээдгүй өндөр шалгуур тавьж байгаа дуулдана. Сахил хүртээд шал дордов гэгчээр 10 хувь болгоно гэх сайдын шоу барилгын үнэ хөөсрөх шалтгаан болчихлоо гэж харагдаад байгаа юм. Засгийн газраас нэрийн дансыг мөнгөжүүлэх эх үүсвэрээ өнөөдрийг хүртэл шийдээгүй.
Нийгмийн даатгалын тухай хуульд өөрчлөлт оруулах асуудлыг өнөө хэр УИХ анхаарахгүй суугаа. Хэзээ тэр хууль батлагдаж, хэзээ төр батлан даагч болохыг хэн ч хэлж мэдэхгүй л сууж байна. Шийдлийн биш шоуны мэдэгдэл хийсний хар гайг өнөөдөр олон хүн амсах нь тодорхой боллоо. Тавантолгойг ярьж хэрэлдсээр магад энэ асуудлаа шийдэж чадахгүй ч байж мэдэх. Үр дүнд нь барилгын компаниуд үнээ хөөрөгдөж, 10 хувь ч байхгүй, асуудал эргээд 30 хувийн хэрүүл дээрээ буух нь.
Цалин нэмнэ гэж шоудахаар маргааш нь өргөн хэрэглээний бараа өсдөг гэдгийг өмнөх Засгийн газрын тэргүүн яс махандаа шингэтэл ойлгочихоод цалинг үе шаттай нэмэгдүүлж үнийн хөөрөгдлөөс сэргийлж байсансан. Яаж хөөрөгдөлгүй хийж чадсаныг эрхэм Д.Цогтбаатар та судлаад үзсэн нь дээр юм биш үү. 10 хувь болгоно гэх шоу арай л эрт эхэлчихлээ. Эхлээд шийдчихээд дараа нь ингэж шоудаач гэж хичээнгүйлэн хүсэх байна.
Тиймээс 10 хувь болголоо гэж сенсаацлахаасаа өмнө барилгын компаниуд, тэр дундаа банкуудтайгаа ойлголцооч гэж иргэн хүний хувиар хичээнгүйлэн хүсье. Банкны шалгуур бахь байдгаараа, барилгын компаниуд энэ мэтээр үнээ нэмчихвэл 10 хувь болгож буян үйлдсэний ач тус гарахгүй нь ээ. Өнгөрсөн сарын барилгын үнийг харахад орон нутагт бага зэрэг бууралт харагдаж байгаа ч нийслэлийн хэмжээнд үнэ өссөн гэсэн мэдээлэл гарчээ.
Нэмэгдэхүүний байрыг сольсон ч нийлбэрийн хариу өөрчлөгдөхгүй гэдэг дээ, Д.Цогтбаатар сайд аа. Цаашлаад эздийг дэмжсэн энэ бодлогын хар гайгаар чанаргүй зээлийн хэмжээ ихэсч, банкны салбар дампуурахад хүрэх вий. Ардын нам, цаашлаад өөрийнхөө нэрэнд 10 хувийн автор нэмэх гэж улайрахаас илүү эрэлт, нийлүүлэлтийг мэдэрсэн илүү мэдрэмжтэй бодлого явуулж, банкны шалгуурыг багасгах, сая төгрөг атгуулсан нь шалгуурт тэнцдэг гажиг тогтолцоог арилгах талаар тэмцвэл зүгээрсэн.