Үндэсний спортын VI их наадам Хүй долоон худагт болох тов гарлаа
Үндэсний спортын VI их наадам зохион байгуулах хорооны хоёрдугаар хурал БСШУСЯ-нд өнөөдөр боллоо. Хурлаар их наадмын зохион байгуулах хорооны гишүүдийн ажил үүргийн хуваарь, ирэх наймдугаар сард хийхээр төлөвлөсөн “Нүүдэлчин” фестивалийн танилцуулга болон 2018 онд хийгдэх ажлын төлөвлөгөөг хэлэлцэх зэрэг асуудлыг шийдвэрлэлээ.
Их наадам нь үндэсний спорт, тоглоом наадгай, ёс заншил, зан үйл, соёлын биет болон биет бус өвийг өсвөр үеийнхэнд өвлүүлэн таниулах, гадна дотнын жуулчид болон судлаачдад сурталчлах зорилготой юм. Их наадмыг олон нийтийн дунд түгээмэл дэлгэрсэн зуны 10, өвлийн дөрвөн үндэсний спортын төрлөөр зохион байгуулна.
Тодруулбал, их наадмын зуны төрөлд үндэсний бөх, үндэсний сурын харваа, хурдан морины уралдаан, шагайн харваа, ширээний шагай, жороо морины уралдаан, уран уургач, бугуйлч, эмнэг булгиулагч, буриад, урианхай, уламжлалт сурын харваа гэсэн 10 төрлөөр зохион байгуулна.
Өвлийн төрөлд мөсний шагай, мөсний сурын харваа, тэмээн поло, хурдан тэмээний уралдаан багтжээ. Энэ жилийн их наадмын өвлийн төрөлд мөсний шагай, мөсний сурын харваа тэмцээнийг амжилттай зохион байгуулсан бол шүлхий өвчин гарсантай холбоотойгоор тэмээн поло, хурдан тэмээний уралдааныг ирэх жил явуулахаар болсон.
Эх сурвалж: БСШУСЯ
