Оросын шуудангийн алба захидал, илгээмжийг дрон буюу алсын удирдлагатай нисдэг төхөөрөмжөөр түгээх туршилт хийжээ.
Анхны туршилтыг өчигдөр Сибирийн Улаан Үд хотод хийсэн боловч ОХУ-д үйлдвэрлэсэн дрон нь хөөрснийхөө дараахан барилга мөргөж осолдсон байна.
Оросын Шуудан компани уг ослыг өөрөөсөө зайлуулж, бусад хүмүүсийн нисгэсэн дрон байсан гэж мэдэгджээ. Харин Буриадын БНУ-ын засгийн тэргүүн Алексей Цыденов хэвлэлд ярихдаа ойр орчмын Wi-Fi дохио дроны нислэгэд саад болсон байх гэжээ. Тэр бас уг дроныг $20,000 орчим үнэтэй гэдгийг хэлсэн байна.
Оросын Шуудан компани хоёр жилийн өмнө илгээмж, захидал хүргэхдээ орчин үеийн технологийн дэвшлийг ашиглах зорилтоо зарлаж байсан юм.
Эх сурвалж: Baikal Media