"Америк, Монголын гадаад харилцаа харилцан ашигтай хамтын ажиллагаагаар үргэлжилнэ"
АНУ-ын Үндэсний Түүхийн музейд Америк дахь Монголын Нийгэмлэгийн Дээд Чуулган зохион байгуулагдаж төлөөлөгчид "Америк ба Монголын шинэ гадаад бодлого" сэдвээр эрдэмтэд, судлаачдын дунд өглөөний хэлэлцүүлгээ эхлүүллээ.
Энэ сарын 23-ны өдөр болсон тус хуралдаанд АНУ-аас Монгол улсад сууж байсан Элчин сайд асан Памела Шлуц, Жонатан Адельтон, Монголч эрдэмтэн Алиша Камп, Куба улсад суугаа Элчин Сайд Ц.Батбаяр, Индонез улсад сууж байсан Элчин сайд Ш.Батцэцэг нар илтгэл хэлэлцүүлсэн байна.
Элчин Сайд Ш.Батцэцэгийн илтгэл Америк Монголын өнгөрсөн 30 жилийн дипломат харилцаанд судлаачын өнцгөөс дүгнэлт өгсөн төдийгүй улс төрийн өвөрмөц системтэй, эдийн засгийн нөхцөл байдлаараа дэлхийн анхаарлын төвд байгаа хөрш хоёр их гүрний Монгол болон гадагш нөлөөлөх улс төр, эдийн засгийн харилцан хамаарал, Ардчилсан Монгол улсын бие даасан гадаад бодлогын ойрын чиг хандлагыг судлаачын дүгнэлтдээ тодорхойлж гаргаж ирсэнээрээ оролцогч бүх талын сонирхолыг их татжээ.
Ш.Батцэцэг өөрийн илтгэлдээ Зүүн Өмнөд Азидаа цорын ганц гэгдэх Ардчилсан Монгол улсын гадаад бодлогод гуравдагч хөрштэй харилцан ашигтай, эдийн засгийн үр өгөөжтэй дипломат харилцааг ХОЖИЛ ХОЖЛЫН зарчимд тулгуурлан явуулах асуудал чухал байгааг онцлон тэмдэглэсэн байна.
Эрдэмтэн, судлаачдын хэлэлцүүлгээс дүгнэхэд Америк, Монголын харилцаа ирэх жилүүдэд тогтсон дипломат харилцаагаа бүхий л салбарт тэлж, бодит үйл ажиллагаа, шийдвэр, үр дүнгээр баяжуулах хандлагатай байна.
Ш.Батцэцэг энэ сарын 26-ны өдөр Америкийн шилдэг 10 сургуулийн нэг Жонс Хопкинсын Их Сургуульд "Зүүн Өмнөд Азийн Интеграцчлал ба Монгол" сэдвээр Доктор Пр. Алиша Кампын хамт илтгэл тавихаар уригджээ.
