Уншиж байна ...
ХУУЧИРСАН МЭДЭЭ: 2018/03/21-НД НИЙТЛЭГДСЭН

Баян-Өлгий аймагт эмнэлэг, цэцэрлэг барих хөрөнгийг 2019 оны төсөвт тусгахаар шийдвэрлэв

ikon.mn
2018 оны 3 сарын 21
iKon.MN
Зураг зураг

Монгол Улсын Ерөнхий сайд У.Хүрэлсүх энэ өдрүүдэд Баян-Өлгий аймагт ажиллаж байна. Тэрээр төрийн албан хаагчидтай уулзахдаа төрийн байгууллагын  бүх шатанд сахилга, хариуцлага тогтоох, энэ талаар Засгийн газраас гаргасан Албан даалгаврыг ягштал мөрдөж, хуулиар хүлээсэн үүргээ биелүүлж ажиллахыг үүрэг болгов.

Баян-Өлгий аймагт эмнэлгийн барилга хамгийн тулгамдсан асуудал болсон байна. 1974 онд ашиглалтад орсон Нэгдсэн эмнэлгийн барилга хуучирч муудан, шаардлага хангахгүй болжээ. Иймээс энэ жил 50 ортой хүүхдийн эмнэлэг барьж, 2019 оны төсөвт 250 ортой эмнэлэг, 250 хүүхдийн цэцэрлэг барих хөрөнгийг тусгахаар Монгол Улсын Ерөнхий сайд У.Хүрэлсүх шийдвэрлэлээ.

Тэрбээр аймгийн эмнэлгийн эмч, ажиллагсадтай уулзахдаа Засгийн газар эрүүл мэнд, боловсролын  салбарт онцгой анхаарч байгааг хэлэв. 97 сургууль, 127 цэцэрлэг барьснаар гурван ээлжээр хичээллэдэг сургуульгүй болж, хүүхэд бүр цэцэрлэгт хамрагдана, эцэг, эхчүүд хүүхдээ цэцэрлэгт өгөх гэж азын сугалаанд найдах шаардлагагүй болно гэлээ.

Аймгийн удирдлага Ховд голын дээгүүр төмөр бетон гүүр барих, хатуу хучилттай зам тавих, Казахстан руу хийж байсан нислэгийг сэргээх, түрээсийн байранд үйл ажиллагаа явуулдаг төрийн 10 байгууллагыг өөрийн гэсэн байртай болгох, Асгатын мөнгөний орд, Түргэний шохойн ордыг түшиглэн цементийн үйлдвэр барих, шинээр сум байгуулахад Засгийн газрын зүгээс дэмжлэг үзүүлэхийг хүсэв. Эдгээр асуудлыг аль болох боломжтой байдлаар шийднэ гэдгээ Ерөнхий сайд У.Хүрэлсүх хэллээ.  

Баян-Өлгий аймаг 103 мянган хүн амтай. 13 сум, нэг тосгонтой. Аймгийн төв Өлгий хотод 35 мянга орчим хүн оршин суудаг. 2.2 сая малтай. Энэ онд улсын төсвийн хөрөнгө оруулалтаар 27.5 тэрбум төгрөгийн 23 төсөл, арга хэмжээ хэрэгжүүлэхээр төлөвлөжээ гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.