Нийслэлийн иргэдийн өмнөөс шийдвэр гаргах түвшинд ажиллаж, тулгамдсан асуудлыг нь цаг алдахгүй шийдвэрлэх зорилгоор НИТХ-ын төлөөлөгчид ажилладаг. Гэтэл сүүлийн үед НИТХ-ын Тэргүүлэгчдийн ирц бүрэлдэхгүйн улмаас хуралдаж чадахаа больсон байна.
НИТХ-ын Тэргүүлэгчдийн хурал өнгөрсөн Баасан гарагт буюу 3 дугаар сарын 9-нд зарлагдсан байсан бол ирц бүрдээгүйн улмаас хуралдаагүй. Уг хурлыг хойшлуулж өнөөдөр буюу 3 дугаар сарын 14-ний 10:00 цагт товлосон боловч өнөөдөр мөн л ирц бүрдээгүй учир тодорхойгүй хугацаагаар хойшиллоо.
Тэргүүлэгчдийн хурлаар:
- “Улаанбаатар хотын хөгжлийн корпораци” ХК-ийн талаарх мэдээлэл сонсох тухай,
- Нийслэлийн төр захиргааны байгууллагуудыг шилжүүлэн байршуулах асуудлын төслийг боловсруулах тухай,
- Хотын дүрмийн төслийг боловсруулах тухай Ажлын хэсэг байгуулах тухай,
- Нийслэлийн гэмт хэргээс урьдчилан сэргийлэх ажлыг зохицуулах зөвлөлийн бүрэлдэхүүнийг шинэчлэн батлах тухай,
- Хурлын ажлын албаны хөдөлмөрийн дотоод журам шинэчлэн батлах тухай,
- Нийслэл Улаанбаатар хотын 360 жилийн ойг тэмдэглэн өнгөрүүлэх тухай,
- Өргөө амаржих газрын ой тэмдэглэх зөвшөөрөл олгох тухай,
- Нийслэлийн иргэдийн Төлөөлөгчийн хурлын ээлжит бус хуралдаан зарлах тухай зэрэг олон асуудлыг хэлэлцэх ёстой байгаа аж.