“AR” технологид суурилсан “Сурагчийн аюулгүй байдал” уншдаг, сонсдог, үздэг номыг Замын цагдаагийн алба, Нийслэлийн Гэмт хэргээс урьдчилан сэргийлэх ажлыг зохицуулах зөвлөлтэй хамтран бүтээж, хэвлүүллээ.
Ерөнхий боловсролын бага, дунд, ахлах ангийн сурагч, хүүхдүүдэд гэртээ байх, гадуур явах, интернетээр аялах, автобус, такси, цахилгаан шатаар зорчих, замын хөдөлгөөнд оролцохдоо гэмт этгээдээс хэрхэн өөрийгөө хамгаалах, урьдчилан сэргийлэх талаар мэдлэг олгож, зөв дадал хэвшүүлэх зорилготой.
“Сурагчийн аюулгүй байдал” ном нь орон байрандаа байх, гадуур гарах үеийн аюулгүй байдал, замын хөдөлгөөн, интернет орчин, хулгай, дээрэм түүнчлэн мансууруулах бодис, хүн худалдаалах зэрэг гэмт хэргээс урьдчилан сэргийлэх мэдлэг олгох нийт 8 бүлэг сэдэвтэй аж.