Дэлхийн Банк: Тогтвортой санхүүжилтийг амжилттай хэрэгжүүлсэн 8 орны нэгээр Монгол нэрлэгдлээ
Монголын банкууд өөрсдийн зээл, санхүүжилт олгох үйл ажиллагаанд тогтвортой санхүүжилтийн зарчмуудыг тусган амжилттай хэрэгжүүлж байгаа талаар өнөөдөр Дэлхийн Банкнаас мэдээлэл хийлээ.
Тухайлбал Дэлхийн банк группийн гишүүн байгууллага болох Олон улсын санхүүгийн корпорацийн /IFC/ дэмжлэгтэй ажилладаг Олон улсын тогтвортой санхүүжилтийн холбооноос гаргасан тайланд энэ талаар дурджээ.
Тогтвортой санхүүжилтийн хэрэгжилтийн тайланд Монгол Улс хамгийн их амжилт гаргасан 8 орны нэгээр нэрлэгдсэн байна.
"Монгол Улсын санхүүгийн салбарт гарсан ахиц дэвшил нь манлайлах түвшинд байсныг тэмдэглэх хэрэгтэй"
Тайлангийн үр дүнгийн тухай ОУСК-ийн Монгол дахь Суурин төлөөлөгч Туен Нгуен мэдээлэл өглөө. Тэрбээр “Монгол Улсын санхүүгийн салбарт гарсан ахиц дэвшлийн талаар танилцуулах болсондоо баяртай байна. Банк, санхүүгийн салбарт тогтвортой санхүүжилтийн зарчмуудыг хэрэгжүүлэх тал дээр Монголын банкууд нэлээн ахицтай ажиллалаа. Дэлхийн хөгжиж байгаа бусад орнуудад үлгэр дуурайл болсон гэдгийг онцлон тэмдэглэе.
Хурдан явъя гэвэл ганцаараа яв, хол явъя гэвэл олуулаа яв гэсэн үг байдаг. Монголын банкны салбарт үйл ажиллагаагаа явуулж байгууллагууд хамтарч ажилласан явдалд талархал илэрхийлье. Дөрвөн жилийн өмнөөс энэ хөтөлбөр Монголд хэрэгжиж эхэлсэн. Тогтвортой санхүүжилтийн холбоо 2012 онд ОУСК-ийн дэмжлэгтэй үүсгэн байгуулагдсан. Үүнээс хойш Монгол Улс маш идэвхтэй гишүүний нэг байсан юм.
2014 оноос Монгол Улсад Тогтвортой санхүүжилтийн зарчмуудын санаачилга гэсэн үйл явцыг эхлүүлсэн. Одоогийн байдлаар Тогтвортой санхүүжилтийн холбоонд 34 улс орон гишүүнээр ажиллаж байгаа нь дэлхийн хөгжиж буй орнуудын санхүүгийн хөрөнгийн 85 хувийг бүрдүүлж байна.
Санаачилга хэрэгжүүлж эхэлснээс хойш анхдугаар тайлан гарлаа. Судалгаанд 15 улс орон хамрагдсанаас Монгол Улсын санхүүгийн салбарт гарсан ахиц дэвшил нь манлайлах түвшинд байсныг тэмдэглэх хэрэгтэй. 34 орноос хамгийн их амжилт гаргасан орнуудын нэг нь Монгол боллоо.
Монголын Банкуудын Холбоо нь Киргиз, Мъянмар улсуудад Тогтвортой санхүүжилтийг хэрхэн хэрэгжүүлэх тал дээр туслалцаа дэмжлэг үзүүлэхээ бидэнд илэрхийлээд байна” гэв.
"Монголын банкууд 12 сараас дээш хугацаатай, 50 сая төгрөгөөс дээш дүнтэй бизнесийн зээлд тогтвортой санхүүжилтийн шалгуурыг тавьдаг"
Энэ талаар ОУСК-ийн Санхүүгийн салбарын ахлах мэргэжилтэн Б.Батмөнх “Гурван үндсэн үзүүлэлтээр судалгаанд хамрагдсан орнуудыг судалсан. Нэгдүгээрт, тухайн орон тогтвортой санхүүжилтийг хэрэгжүүлэхдээ байгаль орчин, нийгэмд үзүүлэх эрсдлийг хэрхэн тооцож байгааг, хоёрдугаарт, тухайн орон санхүүгийн салбартаа ногоон зээлийг хэрхэн дэмжиж байгааг, гуравдугаарт, тогтвортой санхүүжилтийн зарчмуудыг хэрэгжүүлэх эрх зүй, бодлогын таатай орчин бүрдсэн эсэхийг шалгаж үздэг.
Ингэхэд Монгол Улс тогтвортой санхүүжилтийг сайн хэрэгжиж буй 8 орны нэг болсон. Учир нь 2014 оноос Монголын Банкны Холбоо бүх банкуудыг хамруулж Монголын Тогтвортой санхүүжилтийн хөтөлбөрийг хэрэгжүүлж, найман зарчмыг бий болгосон. Монгол юугаараа онцлог вэ гэвэл хувийн банкууд өөрсдийн санаачилгаар нэгдэж, энэ үйл ажиллагааг хэрэгжүүлж байгаа.
Монголын банкууд 12 сараас дээш хугацаатай, 50 сая төгрөгөөс дээш дүнтэй бизнесийн зээлд энэ шалгуурыг тавьдаг” гэв.
"Ногоон зээлийн сан байгуулна"
Монголын Банкны Холбооны Гүйцэтгэх захирал Ж.Үнэнбат “ОУВС-гийн Өргөтгөсөн санхүүжилтийн хөтөлбөрийн хүрээнд Монгол банкууд активын чанарын үнэлгээ хийлгэж, сорилтыг амжилттай даван тууллаа. Бид ОУСК-тай хамт байж, тогтвортой санхүүжилтийн механизмыг бий болгох үйлсэд тодорхой амжилт гаргаж, бусад улсуудын жишиг болсондоо баяртай байна.
Энэ бол Монголын хувийн сектор, банкны салбарын хувьд чухал дүр төрх боллоо. Тиймээс бид ирээдүйд улам хариуцлагатай ажиллах сорилт бидний өмнө тулгарч байна.
Ногоон зээлийн санг байгуулах ажлыг бид сүүлийн хоёр жилийн хугацаанд идэвхтэй ярьж байна. Монголын банкны холбооноос Тогтвортой санхүүжилтийн холбоог тусад нь байгуулсан. Энэ холбоогоор дамжуулан гуравдугаар сард Ногоон зээлийн санхүүжилтийн асуудлыг Дэлхийн уур амьсгалын санд тавьж, санхүүжилт авч, зээлийн механизм бий болгохоор ажиллаж байна. Ингэснээр Ногоон зээлийн санг бүрдүүлнэ” гэв.
