Валентиний баяраар зочид буудлын төлбөрийн гүйлгээ 17 хувь, цэцгийн худалдан авалт 61 хувь өсдөг

Санхүүгийн үйлчилгээний Мастеркард компани “The Mastercard Love Index 2018” судалгааг дэлхийн 200 орны хэрэглэгчдийнхээ 2015-2017 оны хоёрдугаар сарын 11-14-ний өдрүүдийн хэрэглээнд тулгуурлан гаргажээ. Валентиний баярын өдрүүдээр хүмүүсийн худалдан авалтын төлөвт ямар өөрчлөлт гардгийг энд тодруулсан байна.

 

Судалгааны зарим тоо баримтаас дурдвал:

• Энэ хугацаанд аялал жуулчлалд зарцуулах гүйлгээний тоо 17 хувь өсдөг
• Гадуур хооллоход зарцуулсан мөнгөний хэмжээ 68 хувийг эзэлдэг
• Зочид буудлын төлбөрийн гүйлгээ 17 хувь өсдөг
• Контактгүй аргаар хийгдсэн төлбөрийн хэмжээ 166 хувь өсдөг. Энэ нь зам зуур, түргэн үйлчлүүлэх хэлбэр нэмэгддэгийг харуулж байна.
• Төмөр зам, агаарын тээврийн зардал нийт зарцуулалтын 21 хувь болдог
• Ихэнх худалдан авалт хоёрдугаар сарын 11-нд болдог
• Сүүлийн 3 жилийн хугацаанд Ази-Номхон далайн орнуудын иргэд 4.6 сая гүйлгээг хийжээ
• Цэцгийн худалдааны гүйлгээ 61 хувь нэмэгддэг бол зарцуулах мөнгөний дүн 39 хувь нэмэгддэг
• Онлайн худалдааны гүйлгээ 30 хувиар нэмэгддэг ажээ.

Мастеркардын өөр нэг судалгаагаар энэ жилийн Валентиний баярт зарцуулахаар төлөвлөсөн мөнгөөр Ази-Номхон далайн орнуудыг эх газрын Хятадууд тэргүүлж, дунджаар нэг хүн $274 зарцуулахаар болсон байна.

Тэдний араас $245-аар Тайваньчууд, $231-ээр Хонг Конгчууд, $180-аар Сингапурчууд, $145-аар Тайландын иргэд удаалжээ.

Эх сурвалж: Mastercard