"Б.Наранхүүг эгүүлэн татах асуудлаар эцсээ хүртэл явна"
УИХ-ын гишүүн, Хууль зүй, дотоод хэргийн сайд Ц.Нямдоржийг Үндсэн хуульд заасан УИХ-ын гишүүний тангаргаа зөрчсөн үндэслэлээр хэсэг хуульч Үндсэн хуулийн цэцэд хандахаар болжээ.
Тодруулбал, Ц.Нямдоржийг өөрийн цалин орлогоос давсан хэмжээний тэтгэмжийг бизнес эрхлэгчээс сар бүр авч байсан нь УИХ-ын гишүүний тангаргийг зөрчиж энэ нь Үндсэн хуультай зөрчилдөж байгаа үндэслэлээр хуульч нар цэцэд маргаан үүсгүүлэх мэдээлэл явуулах гэж байгаа талаараа мэдээлэл өгнө.
Мөн түүнийг улсын нууц задруулсан зэргээр ч буруутгах үндэслэл байгааг хуульч нар тайлбарлаж байгаа юм.
Үүнээс гадна хуульчид өнөөдөр УИХ-ын гишүүн Б.Наранхүүг эгүүлэн татах, У.Хүрэлсүхийн Засгийн газар Үндсэн хууль зөрчиж бүрдсэн зэрэг асуудлаар ҮХЦ-д хандсан талаараа мэдээлэл өглөө.
Өнөөдөр 12:30 цагаас хэвлэлийн хурлыг бид ШУУД дамжуулах болно.
ШУУД:
Хуульч О.Алтангэрэл "Сүүлийн үед манай хуульчид Үндсэн хуулийн цэцэд чамгүй олон асуудлаар хандлаа.
Миний бие У.Хүрэлсүхийн Засгийн газрыг огцруулах асуудлаар, хуульч Д.Миеэгомбо УИХ-ын гишүүн Б.Наранхүүг эгүүлэн татах асуудлаар, Хуульч Б.Жавхлан Ц.Нямдорж гишүүний асуудлаар хандсан.
Бид Монгол Улсад хууль байгаа л юм бол энэ хандсан асуудлууд хуулийн дагуу шийдэгдэх ёстой гэж ҮХЦ-д хандсан. Энэ мэдээллийн эхний хариунууд гарч ирж байна. Сүүлдээ гаргасан өргөдөл мэдээлэл ямар хүнд хуваарилагдсаныг хүртэл мэдэхэд хаалттай болжээ" гэв.
Хуульч Д.Миеэгомбо "Б.Наранхүү гишүүнтэй холбоотой цэцэд гаргасан мэдээлэл Үндсэн хуулийн 16 дугаар зүйлд хамаатай.
УИХ-ын гишүүн бол нийт ард түмний эрх ашгийг эрхэмлэн баримтална гэж заасан байдаг. Нөгөө талаар УИХ-ын нэгдсэн болон байнгын хорооны хуралдаан УИХ-ын үндсэн үйл ажиллагаа. УИХ-ын гишүүн чуулганд сууж байж л бүрэн эрхээ хэрэгжүүлнэ. Энэ чуулганд суухгүй бол бүрэн эрхээ хэрэгжүүлж чадахгүй. Яг энэ үндэслэлээр Б.Наранхүү гишүүнийг эгүүлэн татах асуудлаар ҮХЦ-д хандсан.
Өнгөрсөн Баасан гарагт ҮХЦ-ээс маргаан үүсгэх боломжгүй гэсэн. ҮХЦ-ийн гишүүн Н.Жанцанг энэ асуудлыг шийдэхээс өмнө бид сольж өгөөч гэж хүссэн.
Одоо энэ асуудлыг ҮХЦ-ийн бага суудлын хуралдаанд гомдол гаргаж цааш нь авч үзэх боломжтой. Н.Жанцан гуайн тайлбараас харж байхад энэ асуудлыг нэлээн доош нь татаж, хөдөлмөрийн харилцааны түвшинд аваачсан байна лээ.
Цэц улс төрөөс бүрэн хамааралтай болсон харагдаад байна. Хууль зүйн хувьд нэлээн дархлагдсан газар. Үүнийг олон нийтийн оролцоотойгоор л хянана. Хуульч бид нэг л байр суурьтай байгаа. Үүний эцсийг үзнэ. Загас толгойноосоо эхэлж өмхийрдөг гэдэг. Манай нийгэм, улс төрийн байдал ийм л байна" гэв.
Хуульч Б.Жавхлан "Ц.Нямдорж сайд өөрөө түрээсийн байранд амьдардаг, байрны эзнийг нь таньдаг учраас ашиглалтын зардал төлөөд амьдардаг гэж хэлсэн.
УИХ-ын гишүүн хууль дээдлэх үндсэн зарчмыг баримталж үйл ажиллагаагаа явуулах ёстой. УИХ-ын гишүүн хуульд зааснаас бусад төсөв, цалин, хангамжийг эдэлж болохгүй.
Энэ асуудалд Үндсэн хуулийн зөрчлийн шинж харагдаж байгаа учраас ҮХЦ хянаж авч үзэх боломжтой" гэв.
Хуульч О.Алтангэрэл "Миний бие ҮХЦ-д хандаад 10 гаруй хоног болж байна. У.Хүрэлсүхийн Засгийн газрыг Үндсэн хууль зөрчиж байгуулагдсан гэсэн асуудал тавьсан.
Монгол Улсад Засгийн газар байгаа юм уу. 15 сайд бүгдээрээ УИХ-ын гишүүд. Тэгэхээр Засгийн газар нь ч, УИХ нь ч биш болчихоод байгаа юм. 32:33 гэсэн балансыг хадгалахын тулд Үндсэн хуулийг зөрчөөд байна" гэв.
Ц.Нямдорж гишүүний асуудлаар Үндсэн хуулийн цэцэд хандсан баримт бичгийн агуулга:
УИХ-ын гишүүн, ХЗДХ-ийн сайд Ц.Нямдорж нь түрээсийн байранд амьдардаг, байрны эзнийг таньдаг учраас ашиглалтын зардлыг нь төлөөд амьдарч байгаа гэх мэдээлэл сүүлийн жилүүдэд олон нийтийн хэрэгслээр мэдээлэгдэх болсон ба энэ нь Монгол Улсым Үндсэн хуулийн Нэгдүгээр зүйлийн 2 дахь хэсэгт заасан “хууль дээдлэх”, Хорин гуравдугаар зүйлийн 1 дэх хэсэгт заасан “Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална”, Монгол Улсын Их Хурлын тухай хуулийн 37 дугаар зүйлийн 37.1.2 дахь хэсэгг заасан “бүрэн эрхээ хэрэгжүулэхтэй холбогдуулж бусдаас шан харамж авах”, 37.1.3 дахь хэсэгт заасан “гишүүний нэр хүнд, бүрэн эрхийг хувийн ашиг сонирхлын үүднээс ашиглах”, 37.1.4 дэх хэсэгт заасан "Гишүүний нэр хүнд, эрх мэдлийг ашиглан үнэт цаас, эд хөрөнгө олох давуу эрх эдлэх, бусдад давуу байдал олгох үйл ажиллагаа явуулах”, 37.1.9 дэх хэсэгт заасан “аливаа байгууллага, ирпнээс нэг сарын цалингийн хэмжээнээс дээш төгрөгийн үнэтэй бэлгийн зүйлсийг хувиараа авах”, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай Монгол Улсын хуулийн 16 дугаар зүйлийн 16.1 дэх хэсэгт заасан “Албан тушаалтан албан үүргээ гүйцэтгэхтой холбогдуулан бусдаас бэлэг шууд буюу шууд бусаар авахыг хориглоно”, 16.4 дэх хэсэгг заасан “Гэр бүлийн гишүүн болон төрөл, садангийн хүнээс бусад этгээдээс авсан нэг удаагийн бэлэг, үйлчилгээний үнэ, холс тухайн албан тушаалтны нэг сарын цалинтай тэнцэх хэмжээнээс хэтэрсэн, эсхүл нэг эх сурвалжаас нэг жилийн туршид хүлээн авсан бэлэг, үйлчилгээний үнэ, хөлс тухайн албан тушаалтны гурван сарын цалинтай тэнцэх хэмжээнээс хэтэрсэн тохиолдолд уг албан тушаалтан энэ тухай эрх бүхий албаы тушаалтанд 30 хоногийн дотор бичгээр мэдэгдэх үүрэгтэй”, Авлигын эсрэг Монгол Улсын хуулийн 7 дугаар зүйлийн 7.1.7 дэх хэсэгт заасан “албан тушаалын байдлаа ашиглан эд хөрөнгө олж авах, давуу эрх эдлэх” гэснийг тус тус зөрчсөн гэж үзэж байна.
Монгол Улсын Их Хурлын гишүүн нь Монгол Улсын Их Хурлын тухай хуулийн 35 дугаар зүйлийн 35.1 дэх хэсэгт заасан гишүүний төсөв, цалин, бусад хангамжийг улсын төсөвт суулган зарцуулах эрхтэй атал танилынхаа орон сууцанд түрээсийн гэрээгээр үнэгүй амьдарч байгаа нь хуулинд заагдаагүй хангамжийг гуравдагч этгээдээс хүлээн авч, бусдаас шан харамж, эсхүл шууд бус бэлэг авах замаар үнэ хөлсгүйгээр бусдын эд хөрөнгийг ашиглаж байна. Тус хуулийн 35 дугаар зүйлийн 35.1 дэх хэсэгт "Гишүүний цалин, нэмэгдэл, унаа, албан томилолт, бичиг хэрэг, холбооны зардлыг Улсын Их Хурлын жилийн төсөвт тусгаж санхүүжүүлнэ" гэж заасан ба дээрх эрх зүйн үйлдлийг хувийн ашиг сонирхлын үүднээс үйлдсэн гэж үзэх нөхцөлийг бүрдүүлж байна. Эрхэм гишүүний оршин сууж байгаа Белла Виста хотхонд орон сууц хөлслөхөд талбайн хэмжээнээс хамааран cap тутамд 3 сая төгрөгөөс 12 сая төгрөгийн хөлсийг хөлслөгч этгээд хөлсүүлэгчид төлж байгаа нь зах зээлийн өнөөгийн ханш бөгөөд үүнээс үзэхэд тэр хэмжээний хөлсийг шууд бус бэлэг хэлбэрээр давуу эрх эдэлж байгаа гэж ойлгогдоход хүрч байна.
Улсын Их Хурлын гишүүн нь Улсын Их Хурлын тухай хуулийн 6 дугаар зүйлийн 2-т заасан “Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж. гишүүний уүргээ чин шударгаар биелүүлэхээ тангараглая” хэмээн төрийн сүлдэнд тангараг өргөснөөр бүрэн эрхээ хэрэгжүүлж эхэлдэг. Энэхүү тангараг ёсоор төрийн хуулийг дээдлэн сахих үүрэгтэй. Гэтэл бүрэн эрхээ хэрэгжүүлэх явцдаа бусдаас хуульд заагдаагүй хангамжийг эдэлж байгаа нь гишүүний тангарагаа зөрчсөн үйл ажиллагаа юм.
Түүнчлэн, Монгол Улсын Их Хурлын гишүүн бол бүх ард түмний төлөөлөл болон төрийн эрх барих дээд байгууллагад ард түмнийг төлөөлөн хууль тогтоох эрх мэдлийг хэрэгжүүлэгчийн хувьд хууль дээдлэх, хуульт ёсыг чандлан сахих бэлгэ тэмдэг, ёс зүйт төрийн албан хаагчийн үлгэр дууриал болон ажиллах албан тушаалтан болохын хувьд бусдын байрыг үнэ төлбөргүйгээр ашиглах нь төрийн түшээ хүний хувьд ёс зүйгүй үйлдэл мөн.
Иймд хуульд заасан төсөв, цалин, хангамжаас илүү давуу эрх эдэлж байгаа УИХ-ын гишүүн Ц. Нямдоржийн талаарх энэхүү мэдээллийг шалгаж, Үндсэн хуулийн Нэгдүгээр зүйлийн 2, УИХ-ын тухай хуулийн 35 дугаар зүйлийн 35.1, 37 дугаар зүйлийн 37.1.2-37.1.4, 37.1.9, Авлигын эсрэг хуулийн 7 дугаар зүйлийн 7.1.7 дахь заалтуудыг зөрчсенийг тогтоож өгнө үү.
Мэдээлэлтэй холбогдох нотлох баримтууд болох түрээсийн гэх тодотголтой байрны өмчлөгчийн талаарх мэдээллийг Оюуны өмч, эрхийн бүртгэлийн ерөнхий газраас албан ёсоор лавлаж, бидэнд танилцуулж өгөхийг хүсье.
