Уншиж байна ...
Зураг
Зураг
ХУУЧИРСАН МЭДЭЭ: 2017/12/06-НД НИЙТЛЭГДСЭН

Өрхийн эмч нарыг ялгаварлан гадуурхахаа зогсоохыг шаардав

А.Үлэмж, iKon.mn
2017 оны 12 сарын 6
iKon.MN
Зураг зураг
Гэрэл зургийг mpa.mn

Эмч, багш нарын тэмцлийн үр дүнд нийт төрийн алба хаагчдын бодит орлогыг нэмэгдүүлэхээр 2017 онд багтаан 300 мянган төгрөг олгохоор улсын хэлэлцээрээр тохиролцож, 55.4 тэрбум төгрөгийг улсын төсөвт батлуулсан билээ.

Гэтэл Өрхийн эрүүл мэндийн төвийн эмч, ажилтнуудад дээрх мөнгийг олгохгүй хэмээн ЭМЯ, Сангийн яамны эрх бүхий албан тушаалтнууд мэдэгдсэн нь өрхийн эмч ажилчдын эсэргүүцэлтэй тулгараад байгаа аж. Энэ талаар өнөөдөр мэдээлэл хийлээ.

Монголын Эрүүл Мэндийн ажилтны ҮЭ-ийн холбооны дарга Б.Мягмар "Монголын эрүүл мэндийн ажилтны ҮЭ-ийн холбооноос 2017 оны төсвийн тодотгол, 2018 оны төсөвт эмч, эмнэлгийн ажилтнуудын цалин орлогыг нэмэгдүүлэхийн төлөө багагүй тэмцэл хөдөлгөөн өрнүүлж, жагсаал, цуглаан, сануулах ажил хаялт хийсэн.

Үүний үр дүнд Улсын 3 талт нэмэлт хэлэлцээрийг байгуулж, улмаар эрүүл мэндийн салбарын 3 талт нэмэлт хэлэлцээрийг өнгөрсөн баасан гарагт эхлүүлж, ихэнх заалтуудыг зөвшилцсөн хэдий ч хэлэлцээр цаашид үргэлжлэх боломжгүй байдалд хүрч хамтын маргаан үүсгэх нөхцөл үүсээд байна.

2011 онд батлагдсан Эрүүл мэндийн тухай хуулийн 16.2-т “Өрхийн эрүүл мэндийн төв нь төрийн үйлчилгээг гэрээгээр гүйцэтгэх үндсэн чиг үүрэг бүхий сайн дурын үндсэн дээр бүртгүүлсэн хувийн хэвшлийн эрүүл мэндийн байгууллага” хэмээн тодорхойлсон байдаг. 

Гэвч Өрхийн эрүүл мэндийн төвүүд нь нэг иргэнээр тооцсон тарифаар 100 хувь улсын төсвөөс санхүүждэг, эрүүл мэндийн салбарын дийлэнх ажлыг үүрч яваа байгууллага. Зах зээлийн зарчмаар ашиг орлого олох боломжгүй нөхцөлд хөгжих гэж төрөөс үзүүлэх анхан шатны тусламж үйлчилгээг чанартай үзүүлэхийн төлөө зүтгэж байна. Өрхийн эрүүл мэндийн төвийн эмч, ажилчид уртасгасан цагаар ажиллаж байна. Гэтэл цалин нь нэг ч төгрөгөөр нэмэгдээгүй. 

Тийм учраас Өрхийн эрүүл мэндийн төвийн 3,000 гаруй эмч, эмнэлгийн ажилтнуудын нэрийн өмнөөс Монголын эрүүл мэндийн ажилтны ҮЭ-ийн холбооноос Монгол Улсын Засгийн газар, ЭМЯ, Сангийн яаманд хандаж өнөөдөр шаардлага хүргүүлж байна.

Эрүүл мэндийн салбарын нийт ачааны 80 хувийг өрхийн эрүүл мэндийн төвүүд үүрч байгаа. Нийт 2,400 хүнд хүрч ажилладаг энэ хүмүүсийг ялгаварлан гадуурхаж байна.

Энэхүү шаардлагыг биелүүлээгүй тохиолдолд энэ сарын 8-нд Баасан гарагт ЭМЯ-ны гадна талбайд эсэргүүцлийн цуглаан, жагсаал хийхээс төлөвлөсөн байна. Цаашлаад хэрэв үр дүн гарахгүй бол Өрхийн эрүүл мэндийн төвүүд дагнан ажил хаялт хийх нөхцөл байдал үүслээ. Монголын төр хүнээ үнэлээч ээ" гэв.

 
Гэрэл зургийг mpa.mn

Шаардлага /бүрэн эхээрээ/

1. Эрүүл мэндийн салбарын 2017-2018 оны хамт(тариф)-ын нэмэлт хэлэлцээрт өрхийн эрүүл мэндийн төвийн эмч, ажилтнуудыг ялгаварлахгүйгээр 300,000 төгрөгийг олгох боломжийг бүрдүүлж, шаардагдах төсвийг шийдвэрлэх,

Энэхүү шаардлагыг хэрэгжүүлээгүй тохиолдолд өрхийн эрүүл мэндийн төвийн ажилтнууд хуулиар олгогдсон эрхээ хэрэгжүүлж, арвандугаар сарын 8-ны өдөр жагсаал, цуглаан зохион байгуулж, цаашид ажил хаялт хийх хүртэл тууштай тэмцэхээр шийдвэрлэснийг үүгээр мэдэгдэж байна гэлээ.

2. Монгол Улсын хэмжээнд нийт 236 өрхийн эрүүл мэндийн төвд 3,000 гаруй өрхийн эмч, эмнэлгийн ажилтнууд нийт хүн амын 70 хувьд стандарт, тусламж үйлчилгээний багцад заагдсан эрүүл мэндийн анхан шатны болон нийгмийн эрүүл мэндийн тусламж үйлчилгээг үзүүлэхээс гадна салбарын бүхий л мэдээ, тайлан, үндэсний 29 хөтөлбөр, стратеги хэрэгжүүлэх, товлолт болон нөхөн дархлаажуулалт, эрүүл мэндийн салбарын цаг үеийн кампанит ажлуудыг цаг хугацаанд нь хийхээр цаг наргүй зүтгэж байна.

3. Үүнээс гадна өдрийн яаралтай дуудлагад айлаар явж, намар, хаврын нөхөн дархлаажуулалт, халдварт бус өвчнийг илрүүлэх үзлэг, “Элэг бүтэн Монгол” хөтөлбөрийн үзлэг гэх мэт эрүүл мэндийн салбарын цаг үеийн бүхий л ажлуудыг нуруундаа үүрч, дахин сэргэж байгаа халдварт өвчний дэгдэлт улаан бурхан, томуу томуу төст өвчний үеэр илүү цагаар ажиллаж, хийсэн хөдөлмөрөө үнэлүүлэлгүй өнөөдрийг хүрлээ.

4. Нэг өрхийн эмч сувилагчид 2,200-3,200 хүн ам, 70-123 нярай хүүхэд, 60-135 жирэмсэн эх, 89-110 өндөр настан, 15-35 хэвтрийн иргэд ноогдож, тэдэнд гэрийн идэвхтэй эргэлт, эмнэлгийн болон сувилахуйн тусламж үйлчилгээ үзүүлж байна. Өдөрт нэг өрхийн эмч сувилагч дунджаар 30-64 хүнд үзлэг, эмчилгээ хийж, зөвлөгөө өгөхөөс гадна яаралтай 5-7 дуудлаганд явж байна.

5. Салбарын цаг үеийн ажлууд болон Засгийн газрын мөрийн хөтөлбөрт тусгагдсан бүхий л ажлыг тухайлбал “Элэг бүтэн монгол “ үндэсний хөтөлбөр, улаан бурхан болон томуугийн нэмэлт дархлаажуулалтыг заасан хувьд нь хүргэх гэж ажлын үнэлэмжгүйгээр гутлаа эргэтэл, нохойд хөөгдөж айл, айлын хаалга нүдэж, хагас бүтэн сайнгүй илүү цагаар эрүүл мэндийн тусламж үйлчилгээг иргэдэд түргэн шуурхай хүргэж байна.

 
Гэрэл зургийг mpa.mn

6. Бид үнэлэмжгүй олон ажил хийлээ гэж хэзээ ч төрөөс мөнгө нэхэж, хэцүү байна гэж гомдол гаргадаггүй. Гэтэл энэ ажлыг өөр хүмүүс хийхдээ маш их хөлсөөр, өндөр ажлын үнэлэмжтэйгээр хийдэг юм байна. Элэг бүтэн монгол үндэсний хөтөлбөрөөр бидний хийсэн шинжилгээний бэлэн сийвэнд зөвхөн С вирусын идэвхжил тоолоход лабораториудад нэг иргэнд 80,000-130,000 төгрөг төрөөс өгсөн. Сайн дурын нэмэлт дархлаажуулалтыг хувийн эмнэлгүүд нэг иргэнд 15,000-25,000 төгрөгөөр хийж байх жишээтэй.

Гэтэл Өрхийн эрүүл мэндийн төвийн эмч, сувилагч нараар хийлгүүлэхдээ бүх тусламж үйлчилгээ нь үнэ төлбөргүй, төрөөс өрхийн эрүүл мэндийн төвийн ажилчдын нийгмийн асуудал шийдэх болохоороо адилхан хүн ардынхаа төлөө зүтгэж байгаа салбарын Эрүүл мэндийн анхан шатны болон нийгмийн эрүүл мэндийн тусламж үйлчилгээг үүрч яваа цагаан нөмрөгтэй эмч ажилчдаа ялгаварлан гадуурхаж байгааг эсэргүүцлээ.

Бид Эрүүл мэндийн анхан шатны салбарыг хөгжүүлэх, тусламж үйлчилгээг сайжруулахын төлөө сэтгэл зүрх нэгтэй ажиллаж байна. Гэхдээ бид эрүүл мэндийн салбартаа дээрх бүх ажлыг үнэ төлбөргүй хийснийхээ төлөө гадуурхагдаж төрөөс үзүүлж байгаа Эрүүл мэндийн ажилчдын бодит орлогыг нэмэгдүүлэхээс хасаж байгааг эсэргүүцэж, олгохыг шаардаж байна гэлээ.

 

МОНГОЛЫН ЭРҮҮЛ МЭНДИЙН АЖИЛТНЫ ҮЭ-ИЙН ХОЛБОО