Илон Маск дэлхийн хамгийн том баттерейг ажилд орууллаа

Өнөөдөр Австрали улсад дэлхийн хамгийн том баттерей ажиллаж эхэлжээ. Энэхүү төслийг Tesla компанийн үүсгэн байгуулагч Илон Маск удирдсан бөгөөд өмнөд Австралийн 30,000 гаруй өрхийн цахилгааны хэрэглээг хангах чадалтай юм.

Энэ бүс нутагт өнгөрсөн зун хэт халуун болж, хүчтэй салхи шуурга дэгдэх үеэр цахилгааны бүрэн хомсдолд орж байв. Тиймээс зуны их халуунаас урьтаж энэхүү эрчим хүчний нөөц үүсгүүрийг нээж байгаа юм. Австралид өнөөдрөөс зуны улирал нь эхэлж байгаа.

Маск энэхүү аварга системээ 100 хоногийн дотор угсарч, ажиллуулна гэж амлаж байсандаа ийнхүү хүрсэн байна.

Австралийн өмнөд хэсгийн Жэймстаун хотод байгуулсан 100MW/129MWh хүчин чадалтай баттерейн системийг Францын Neoen компанийн байгуулсан салхин парктай холбосноор эрчим хүч нөөцлөх ажил нь эхэлж байгаа юм.

Австралид жил бүрийн зун хөргөх техник хэрэгслүүд их ашигласнаас хамгийн их эрчим хүчний хэрэглээтэй байдаг. Ноднин зун болсон эрчим хүчний тасалдал нь нүүрс, байгалийн хийн дэлхийн хамгийн том олборлогч улсуудын нэг гэгддэг Австралийг цочролд оруулж байжээ.

Эх сурвалж: AFP