ДОХ-ын халдвар авсан 249, нас баралтын 40 тохиолдол бүртгэгдээд байна
Дэлхий нийтээрээ жил бүрийн арванхоёрдугаар сарын 1-ний өдрийг ДОХ-ын эсрэг олон нийтийн анхаарал хандуулах өдөр болгон тэмдэглэдэг уламжлалтай.
2017 онд энэ өдрийг Монгол Улс "Би сэргийлж чадна. Харин та..." гэсэн уриан дор тэмдэглэн өнгөрүүлж байна.
Харин дэлхий дахинд "Эрүүл амьдрах эрх" сэдвийн хүрээнд тэмдэглэн өнгөрүүлж буй юм. Энэ өдрийг тохиолдуулан өнөөдөр ЭМЯ болон бусад холбогдох байгууллагуудаас мэдээлэл хийлээ.
ХДХВ/ДОХ-ын өнөөгийн байдал
Өдгөө дэлхий дахинд ХДХВ/ ДОХ нь 39 сая гаруй хүний аминд хүрээд байна. Мөн өнөөдөр дэлхий дахинд ХДХВ-ийн халдвар тээгч 36.7 сая гаруй хүн амьдарч байгаагийн 2.5 сая гаруй нь 15 хүртэлх насны хүүхдүүд аж.
Харин Монгол Улсад 1992 онд ХДХВ-ийн халдварын анхны тохиолдол бүртгэгдсэнээс хойш 2017 оны арваннэгдүгээр сарын байдлаар, ХДХВ-ийн халдвар авсан 249, нас баралтын 40 тохиолдол бүртгэгдээд байна.
Энэ он гарснаас хойш ХДХВ/ДОХ-оор нас барсан 5 тохиолдол бүртгэгдээд байгаа аж.
Бүртгэгдсэн тохиолдлууд бүгд бэлгийн замаар дамжсан нь тогтоогдоод байна. Өнөөгийн байдлаар цус цусан бүтээгдэхүүнээр, эмнэлгийн тусламж үйлчилгээтэй холбоотой, мөн эхээс хүүхдэд халдвар дамжсан тохиолдол бүртгэгдээгүй байна.
ХДХВ-ийн халдвартай 14 эхээс төрсөн 20 хүүхдийг эхээс хүүхдэд халдвар дамжихаас сэргийлэх арга хэмжээнд хамруулж, хяналтад оруулж байгаа гэв. 2016 онд ХДХВ-ийн халдвартай 7 жирэмсэн эх хянагдаж байсан бол 2017 онд 9 жирэмсэн эх хянагдаж байгаа аж.
Нийт бүртгэгдсэн тохиолдлын 20 хувийг 15-24 насны, 40 хувийг 25-34 насны хүн ам эзэлж байна.
Нийт тохиолдлоос эмэгтэйчүүд 18.6%, эрэгтэйчүүд 81.1% ийг эзэлж байгаа ба үүний 78.7% нь бэлгийн цөөнх эрэгтэйчүүд ажээ.
2017 онд хийгдсэн шинэчилсэн тооцооллоор Монгол улсад 2017 оны эцсийн байдлаар ХДХВ-ийн халдвартай 575 хүн, 2020 онд 648 хүн байж болох тооцоолол хийжээ.
"Монгол Улс ХДХВ-ийн халдварын илрүүлэг оношилгоонд анхаарах нь чухал байна"
НҮБ-ын ХДХВ/ДОХ-ын хөтөлбөрөөс гаргасан мэдээллээр Монгол Улс ХДХВ-ын халдвартай хүмүүсийн 35 хувийг оношилсон байна. 2017 онд хийгдсэн шинэчилсэн тооцооллоор Монгол улсад 2017 оны эцсийн байдлаар ХДХВ-ийн халдвартай 575 хүн, 2020 онд 648 хүн байж болох тооцоолол хийжээ.
Тиймээс эрт илрүүлэлт, оношилгоо, шинжилгээнд хамрагдах ёстой хэмээн албаныхан тайлбарлаж байлаа.
ХӨСҮТ-ийн захирал Д.Нямхүү "ХДХВ-ийн халдварын тархалтыг 2020 он гэхэд хяналтандаа авч, цаашид ямар ч улс орны хувьд нийгмийн эрүүл мэндийн тулгамдсан асуудал биш болгохоор 90-90-90 зорилт тавин ажиллаж байна.
2017 оны 11 сарын байдлаар нийт бүртгэгдсэн тохиолдлоос манай улсад ХДХВ, ДОХ-ын тусламж үйлчилгээ авч байгаа хүмүүсийн 93.5% нь ретровирүсийн эсрэг эмчилгээ (РВЭЭ)-нд хамрагдаж байна. РВЭЭ-нд хамрагдсан хүмүүсийн 92%-д ХДХВ-ийн ачаалал дарангуйлагдсан байна.
Иймд манай орны хувьд ХДХВ-ийн халдварын илрүүлэг оношилгоонд анхаарах нь чухал байна. Халдвар авснаас хойш ДОХ-ын шинж тэмдэг илрэх хугацаа хүн бүрт харилцан адилгүй байдаг. ХДХВ-ийн халдвартай ихэнх хүмүүс эрүүл харагдах учир хэн нэгэн хүнийг гаднаас нь хараад халдвартай гэж хэлэх боломжгүй. Шинж тэмдэг илрээгүй ч ХДХВ-ийн халдвартай хүн халдвараа бусдад тараадаг" гэв.
"Глобал сан" ХДХВ/ДОХ-ын эсрэг хөтөлбөрт нийт 24.5 сая ам.долларын санхүүжилт олгожээ
"Глобал сан"-гийн зохицуулагч А.Оюунбилэг "2003 оноос эхэлж Монгол Улс Глобал Сангаас санхүүжилт авсан. Өнөөдрийн байдлаар ХДХВ/ДОХ-ын эсрэг хөтөлбөрт нийт 24.5 сая ам.долларын санхүүжилт авсан байна.
Хоёр хоногийн өмнө ЭМЯ-тай хамтран ажиллах шинэ төслийн гэрээнд гарын үсэг зурсан.
Глобал Сан нь зөвхөн санхүүжилт олгодог байгууллага. Цаашид ХДХВ/ДОХ-ын эсрэг арга хэмжээ авахын тулд 5.4 сая ам.долларын нэмэлт санхүүжилт хэрэгтэй гэсэн тооцоо байна. Өнгөрсөн хугацаанд олгосон санхүүжилтийн үр дүн ч сайн байгаа" гэлээ.
Монгол Улс Нийслэлийн 9 дүүрэг, 21 аймгийн улсын эмнэлгүүдэд ХДХВ-ийн шинжилгээ үнэ төлбөргүй хийдэг. Тиймээс иргэдийг үзлэг шинжилгээнд идэвхтэй хамрагдахыг уриаллаа.
