Монгол Улсад шинжлэх ухааны байгууллага үүсэж хөгжсөний 96 жил, “Шинжлэх ухааны ажилтны өдөр”-т зориулсан баярын хурал болж 2017 оны шилдэг бүтээлийн эздийг тодрууллаа.
Баярын хурлыг нээж ШУА-ийн Ерөнхийлөгч Д.Рэгдэл үг хэлсэн юм. Тэрбээр "Хүн төрөлхтөн түүхэндээ бий болгосон, нийгэмд хамгийн өргөн хүрээнд ач тусаа өгч байдаг, гайхамшигтай, том бүтээл, эрхэмсэг шинжлэх ухаанд цаг зуурын бэрхшээл цалин мөнгөний гачаалыг үл хайхран хоёргүй сэтгэлээр зүтгэж, хувь нэмрээ оруулж яваа та нараараа бид ямагт бахархдаг.
Хүмүүн хэмээх бодгалийн хувь заяа нь түүний мөрөөдөл, мөрөөдөлдөө хүрэх зүтгэл хоёроор тодорхойлогдож байдаг бол хүн төрөлхтөн болоод манай цэнхэр гарагийн хувь заяа шинжлэх ухаанаас бүрэн хамаарах болоод байгаа нь глобал уур амьсгалын өөрчлөлтөд дасан зохицох стратеги, даян дэлхийн ногоон хөгжлийн үзэл баримтлал зэрэг дэлхийн хэмжээний бодлогын баримт бичгүүдэд хэдийнээ тусгалаа олоод байна.
Энэ цаг Монгол орны нийгэм, эдийн засаг, шинжлэх ухаан, технологи, инновацийн хөгжлийг улам эрчимжүүлэх, шинэ үеийн монголчуудыг эрүүл бие бялдартай, саруул ухаантай, цэвэр ёс суртахуунтай хувь хүн болгон төлөвшүүлэхэд манай орны шинжлэх ухаан, боловсролын байгууллага эрдэмтэн мэргэдийн гүйцэтгэх үүрэг хариуцлага, эрэлт хэрэгцээ улам бүр өсөн нэмэгдэж байна" гэлээ.
1-р байрт
2-р байрт
3-р байрт
Тусгай байрт
“Нүүрсний үнсний шинж чанар, иж бүрэн боловсруулалт, хэрэглээ” бүтээлээрээ энэ жил хоёрдугаарт байрт орсон Шинжлэх ухааны академийн Хими, химийн технологийн хүрээлэнгийн доктор, академич Ж.Тэмүүжингээс түүний бүтээлийн талаар тодрууллаа.
ШУА-ийн Хими, химийн технологийн хүрээлэнгийн доктор, академич Ж.Тэмүүжин "Дэлхий нийтэд дулааны цахилгаан станцын хаягдал үнсийг хэрхэн ашигладаг, өмнө нь ашиглаж байсан туршлагад үндэслэн Монгол орны төвийн бүсийн дулааны голлох цахилгаан станцуудыг үнсийг судаллаа.
Эдгээрийг боловсруулан, нэмүү өртөг шингэсэн бүтээгдэхүүн үйлдвэрлэх боломжтой болохыг гаргаж ирсэн. Түүнчлэн гэр хорооллын өрхүүд өргөнөөр ашигладаг Налайх, Алагтолгой, Багануурын нүүрсний үнсийг ашиглах боломжийг тогтоосон урьдчилсан судалгааны үр дүнгээ тусгасан.
Цахилгаан станцын үнсийг цацраг идэвхтэй гэдэг үндэслэлээр хэрэглэдэггүй байсан бол судалгааны үр дүнд бага хэмжээгээр бетонд холиход дэлхийн болон Монгол Улсын барилгын материалд тавигдах стандартаас давах хэмжээний цацраг ялгаруулахгүй гэдгийг мэдсэн.
Түүнчлэн Дөрөвдүгээр цахилгаан станцын үнсийг ашиглан цементгүй бетон буюу шинэ төрлийн холбогч материалыг үйлдвэрлэх боломжтой, ямар нэгэн цацрагийн асуудалгүй гэдгийг гаргаж ирсэн" гэсэн юм.