Кристиан Эриксен Данийн "Баатар" болов

Ирэх жил ОХУ-д явагдах хөлбөмбөгийн ДАШТ-д оролцох 32 шигшээ багийн 30-ын нэрс тодорлоо. Өчигдөр шөнө европын бүсийн плэй-оффын сүүлчийн хос буюу Ирланд, Данийн шигшээ багуудын хариу тоглолт Дублин хотноо явагдлаа.

Эхний тоглолтод “хуурай” тэнцээд байсан хоёр улсын хариу тоглолтод нийт зургаан гоол орсон юм. Тоглолтын эхний гоолыг талбайн эздээс 6 дахь минутад Шэйн Даффи оруулсан бол түүний нутаг нэгт Сайрус Кристи өөрийн хаалганд гоол оруулж тооны харьцааг тэнцүүлсэн. Энэ гоолоос ердөө гурван минутын дараа Данийн Кристиан Эриксен нэгэн гайхалтай цохилтоор тэргүүллийг багтаа авчирсан. Үүнээс хойш тэрбээр 63 болон 73 дахь минутуудад гоол оруулж хэттрик хийснээр тоглолтод цэг тавьсан гэхэд болно. Тоглолтын төгсгөлийн 90 дэхь минутад өөрийн авчирсан 11 метрийн торгуулийн цохилтыг амжилттай гүйцэтгэж Даничууд Ирландыг 5:1-ээр талбайд нь буулган авлаа.

Ингэснээр Даничууд найман жилийн дараа ДАШТ-д оролцох болсон бол Ирландын шигшээ баг 2002 оноос хойш шилдэг 32 багийн тоонд багтаж чадсангүй. Ингэхдээ 2010, 2018 оны урьдчилсан шатны плэй-оффоос хасагдаж байна.