Трампын тушаалаар Дутертэ хайрын тухай дуу дуулжээ
Филиппинд өнөөдөр ASEAN-ий дээд хэмжээний уулзалт эхэлж байгаа. Өчигдөр тус улсын ерөнхийлөгч Родриго Дутертэ хүндэт зочиддоо зориулж зоог барьсан бөгөөд энэ үеэр гэнэтийн бэлэг болгон дуу дуулж авьяасаа үзүүлжээ.
Гэхдээ тэр дуу дуулсан шалтгаанаа “АНУ-ын зэвсэгт хүчний ерөнхий командлагчийн тушаалаар” гэж хошигносон байна.
Дутертэгийн дуулсан дуу нь хайрын сэдэвтэй бөгөөд Филиппиний алдартай дуучин эмэгтэй Пилита Корралестай хоршин дуулсан юм.
Дууны үг нь “Чи бол миний удтал хүлээсэн хайр юм. Миний зүрх цөхрөлтгүй чамайг хүлээсэн. Чи миний цорын ганц хайр” гэх мэтчилэн өгүүлдэг ажээ.
Өчигдөр ийнхүү албан бус байдлаар наргиж цэнгэсэн Трамп, Дутертэ нар өнөөдөр албан ёсны хэлэлцээр хийж, сүүлийн үед хөндийрөөд байгаа АНУ-Филиппиний харилцааг сайжруулах алхмууд хийх юм.
Эх сурвалж: Russia Today
