Цагдаагийн Ерөнхий Газраас тусгай дуут болон гэрэл дохиотой холбоотой хэрэгжүүлж байгаа ажил, цахим гэмт хэргийн талаар өнөөдөр мэдээлэл хийлээ.
Замын цагдаагийн албаны дарга, цагдаагийн хурандаа Б.Даваазул "Монгол Улсын Засгийн газрын хуралдаанаар Ерөнхий сайдаас өгсөн үүргийн дагуу “Тээврийн хэрэгсэлд тусгай дуут болон гэрэл дохио тавьж хэрэглэх журам”-ын хэрэгжилтийг хангуулах, зөвшөөрөл олгох үйл ажиллагааг сайжруулах, хяналт тавих, гарч байгаа зөрчил дутагдлыг арилгах зорилгоор Цагдаагийн байгууллагаас нэгдсэн төлөвлөгөө, ажлын хэсэг гарган энэ оны 10 дугаар сарын 30-ны өдрөөс эхлэн хяналт шалгалтыг зохион явуулж байна.
Нийт илэрсэн зөрчлийг төрөлжүүлвэл зөвшөөрлийн хугацаа дууссан 30, зөвшөөрөлгүй 66 , зөвшөөрлийн он засвартай 3, зөвшөөрснөөс өөр өнгийн гэрэл дохио хэрэглэсэн 3 зөрчил тус тус илэрсэн бөгөөд дийлэнх зөрчил нь зөвшөөрөлгүй тусгай дуут гэрэл дохио ашиглах, зөвшөөрлийн хүчинтэй хугацаа дууссан мөн гадна талаас харахад өнгө тодорхойгүй туузан гэрэл дохиог ихээр тавьж хөдөлгөөнд оролцож байна.
Мөн энэ оны эхний 10 сарын байдлаар гудамж замын хяналтаар улсын хэмжээнд “Тээврийн хэрэгсэлд тусгай дуут болон гэрэл дохио тавьж хэрэглэх журам” зөрчсөн 156 зөрчлийг илрүүлж, 16,460,000 төгрөгийн торгууль ногдуулан ажилласан. Цаашид тээврийн хэрэгсэлд тусгай дуут болон гэрэл дохио тавьж хэрэглэх журмын хэрэгжилтийг сахиулах, хяналт шалгалтыг тасралтгүй явуулж ажиллахаар төлөвлөж байна.
Уг журмын хүрээнд 2017 оны эхний 11 дүгээр сарын байдлаар тус төвөөс тээврийн хэрэгсэлд тусгай дуут болон гэрэл дохио тавьж хэрэглэх хүсэлтээ гаргасан 649 байгууллага, хуулийн этгээдийн 1,412 тээврийн хэрэгсэлд тусгай дуут болон гэрлэн дохио тавьж хэрэглэх зөвшөөрөл олгож шийдвэрлэсэн нь өмнөх оноос 22 хувиар буурсан үзүүлэлттэй байна" гэв.