Засгийн газрын ХМА-ны дарга, Ерөнхий сайдын хэвлэлийн төлөөлөгч нар томилогдлоо
У.Хүрэлсүхийн толгойлох шинэ Засгийн газрын Хэвлэл мэдээллийн албаны дарга болон Ерөнхий сайдын хэвлэлийн төлөөлөгч нар өнөөдөр албан ёсоор ажлаа хүлээн авсан байна.
Засгийн газрын Хэвлэл мэдээлэл, Олон нийттэй харилцах албаны даргаар “Ийгл” телевизийн тоймч Ц.Ганзоригийг томиллоо.
Ц.Ганзориг нь инженер, сэтгүүлч мэргэжилтэй.
Сэтгүүлзүйн салбарт 2008 оноос хойш “С1”, “Бтв” телевизэд улс төр, эдийн засгийн сэтгүүлч, “Ийгл” телевизэд эдийн засгийн албаны дарга, Ерөнхий продюсерээр ажиллаж байсан.
Ц.Ганзориг нь эдийн засаг, улс төрийн мэдээ, нэвтрүүлэг, хэлэлцүүлэг бэлтгэдэг бөгөөд хөрөнгийн зах зээлийн дээд шагнал “Грандбулл”-ын эзэн сэтгүүлч юм. Тэрбээр “Хэвлэлийн хүрээлэн”, “АНУ-ын олон улсын хөгжлийн агентлаг” хамтарсан эдийн засгийн шилдэг бүтээл, шилдэг эдийн засгийн шагналыг хоёр ч удаа хүртэж байсан юм.
Харин Ерөнхий сайдын хэвлэлийн төлөөлөгчөөр “Ийгл” телевизийн тоймч Ө.Золбаярыг томилжээ. Тэрбээр сэтгүүл зүйн салбарт 2004 оноос ажиллаж эхэлсэн. 2006-2012 оны долдугаар сар хүртэл “ТМ” телевизийн мэдээний албаны дарга, 2012 оноос өдийг хүртэл “Ийгл” телевизэд тоймч, ахлах редакторын алба хашиж байсан.
Ө.Золбаяр нь улс төр, уул уурхайн сэдвээр дагнан мэргэшсэн сэтгүүлч юм.
Засгийн газрын Хэвлэл мэдээллийн албаны даргаар өмнө нь сэтгүүл зүйн салбарын мөн л олон жилийн туршлагатай, шилдэг сэтгүүлч, тоймчид болох Г.Отгонбаяр, Ерөнхий сайдын Хэвлэлийн төлөөлөгчөөр Д.Отгонжаргал нар ажиллаж байсан билээ.
