Лэйкерс Коби Брайнтын дугаарыг мөнхөлнө
Лэйкерсийн төлөө 20 улирал үнэнчээр хүчин зүтгэсэн Коби Брайнтын дугаарыг ирэх 12-р сарын 18-ны өдөр Степлес Центерт Голден Стэйт Уарриорсыг хүлээн авах тоглолтын дундуур мөнхөлнө гэдгээ мэдэгджээ.
Үүний дараа Кобигийн яг аль дугаарыг нь мөнхлөх вэ гэдэг асуулт олон үзэгчдийн анхаарлыг татаад байсан юм.
Тэгвэл өнөөдөр ESPN-ий сэтгүүлч Рамона Шелбурн Кобигийн найм болон 24 гэсэн дугааруудыг аль алийг нь мөнхлөхөөр болсон гэдгийг мэдэгдсэн байна.
Лигийн түүхэнд хоёр өөр багт дугаараа мөнхлүүлсэн хэд хэдэн тоглогч байдаг билээ. Тэгвэл Коби Брайнт нэг багтаа хоёр өөр дугаараа мөнхлүүлсэн түүхэн дэх анхны тоглогч болох нь.
Коби Лэйкерсийн хамтаар найм дугаартай тоглож байх үедээ гурван удаа аварга цол хүртсэн бол 2006/2007 оны улирлаас эхлэн 24 дугаартай тоглох болж, түүнээс хойш хоёр удаа аварга цол хүртэж, нэг удаа улирлын үнэ цэнэтэй тоглогч болж байсан юм.
