"Бутан улс Монголоос адуу, сарлагийн хөлдөөсөн үр, монгол банхар авах сонирхолтой байгаа"
Гадаад харилцааны сайд Ц.Мөнх-Оргил, Бутаны Вант Улсын Гадаад хэргийн сайд Дамчо Доржи нар өчигдөр Гадаад харилцааны яаманд албан ёсны хэлэлцээ хийв.
Хэлэлцээний эхэнд хоёр улсын Гадаад харилцааны сайд нар Монгол, Бутан хоёр улс түүх, соёлын өв, шашин шүтлэгийн хувьд ижил төстэй бөгөөд Ази, Номхон далайн бүс нутгийн хөгжиж буй, далайд гарцгүй орнуудын хувьд хоёр талын болон олон улс, бүс нутгийн түвшинд хамтын ажиллагаагаа гүнзгийрүүлэх эрмэлзэлтэй байгаагаа нотоллоо.
Бутан Улсын Гадаад хэргийн сайд анх удаа Монгол Улсад айлчилж байна
Сайд Ц.Мөнх-Оргил манай хоёр улс 2012 онд дипломат харилцаа тогтоосноос хойш Бутан Улсын Гадаад хэргийн сайд анх удаа Монгол Улсад айлчилж байна. Үндэсний өв соёлоо нандигнан хадгалж ирсэн бутанчуудаас суралцах зүйл их бий. 2016 онд Монгол Улсын Гадаад харилцааны сайдын хувиар Бутан Улсад айлчлах үеэр харилцаа, хамтын ажиллагааг хөдөө аж ахуй, аялал жуулчлал, эрүүл мэнд гээд олон салбарт хөгжүүлэх талаар ярилцсанаа онцлов.
Хөдөө аж ахуй, эрүүл мэндийн салбарт Монгол Улсын туршлагаас судалж, оюутан суралцуулна
Бутан Улсын Гадаад хэргийн сайд Дамчо Доржи “Монголын сайхан оронд анх удаа айлчилж байгаадаа баяртай байна. Бид монголчуудаас гаралтай хүмүүс. Хоёр улсын Гадаад харилцааны сайд нар богино хугацаанд харилцан айлчилж байгаа нь Монгол, Бутаны харилцаанд чухал үйл явдал болж байна” хэмээн тэмдэглэлээ.
Мөн хөдөө аж ахуй, эрүүл мэндийн салбарт Монгол Улсын туршлагаас судалж, оюутан суралцуулах, Монголоос адуу, сарлагийн хөлдөөсөн үр, монгол банхар авах сонирхолтой байгаагаа илэрхийлэв.
НҮБ-ын энхийг сахиулах үйл ажиллагааны хүрээнд хамтын ажиллагааг эхлүүлж, манай “Хааны эрэлд” энхийг дэмжих ажиллагааны сургалтад оролцох хүсэлтэй байгаагаа нотлов.
Өмнөд Азид аялж буй монголчууд аяллынхаа маршрутад Бутаныг нэмээсэй, энэ чиглэлд төлөөлөгч солилцож, харилцан улс орноо сурталчлая хэмээх саналыг бутаны тал дэвшүүлэв.
Фото
Гэрэл зургийг mpa.mn
