ФОТО: Усны тоолуур ухаалаг системд шилжлээ
Монгол Улсын "Дэд бүтэц иженеринг" ХХК болон ОХУ-ын "Арзамас" тоног төхөөрөмжийн үйлдвэр хамтран усны тоолуурыг ухаалаг системд шилжүүлэх шинэ технологийг амжилттай нэвтрүүлж өдөрт 1,000 ширхэг тоолуур хэмжих хүчин чадал бүхий лаборатори Сүхбаатар дүүрэгт байрлах "Pro One" оффиссын байранд нээгдлээ.
Улаанбаатарын усны замбараагүй хэрэглээ гамшгийн хэмжээнд хүрэх магадлалтай
"Нийслэлийн иргэдийн хурал дахь "Аз жаргалтай хот хороо"-ны дарга Р.Дагва "Цэнхэр алт гэх усны хэрэглээг зөв зохистой болгох чиглэлд нийслэлээс дэмжиж ажиллах ёстой байдаг.
Энэ дөрвөн жил иргэдийг эрүүл, аюулгүй орчинд амьдрах боломж нөхцөлийг бүрдүүлэх чиглэлийн ажилд усны зөв хэрэглээ буюу цэвэр усыг нийслэлийн иргэдэд яаж хүртээмжтэй ухаалгаар шуурхай хүргэх вэ гэдэг тулгамдсан асуудал болоод байгаа.
Магадгүй ойрын хугацаанд Улаанбаатарын усны замбараагүй хэрэглээ гамшгийн хэмжээнд хүрэх магадлалтай.
Тиймээс энэ асуудлыг ухаалгаар шийдвэрлэхэд чиглэсэн ийм лаборатори нээгдэж байгаад тун талархалтай байна" гэсэн юм.
Хэдэн цагт ямар хүчтэй магнитаар үйлчилсэн болохыг тодорхойлно
"Арзамас" үйлдвэрийн дарга Сурнин Михаил Иванович "Нэгдүгээрт аливаа усны хэрэглээний мэдээллийг цуглуулахад их хялбар болж байгаа юм.
Хоёрдугаарт тоолуурын заалт үнэн зөв байна. Өөрөөр хэлбэл хэн нэгэн тоолуурын заалтыг өөрчлөх гэсэн оролдлого гарвал шууд төв дээр мэдэгдэнэ.
Хэдэн цагт ямар хүчтэй магнитаар үйлчилсэн болохыг тэр дор нь тодорхойлно.
Гуравдугаарт хэрэглэгчдэд маш амар байна. Хэн нэгэн очоод усны тоолуурыг чинь авъя, цахилгааны заалтыг чинь авъя гэсэн зүйл огт байхгүй болно. Нэмж хэлэхэд энэхүү ухаалаг технологийг ашиглахад маш хялбар үнийн хувьд хямд гэдгийг хэлмээр байна" гэлээ.
ОХУ-аас Монгол Улсад Суугаа Худалдааны Төлөөлөгчийн Газрын Тэргүүн Васильев Максим Викторович "Оросын технологиийн тусламжтайгаар Монголын "Дэд бүтэц инженеринг" компани технологийн өндөр түвшинд хүрж байгааг харахад баяртай байна" гэв.
Компанийн танилцуулга: Стриж “Аква 1” ухаалаг тоолуур нь ОХУ-ын "Арзамасский приборостроительный завод имени П.И.Пландина” буюу “АПЗ” үйлдвэрийн бүтээгдэхүүн. 1957 онд байгуулагдсан тус үйлдвэр цэргийн болон иргэний гэсэн хоёр ангилалаар үйлдвэрлэл явуулдаг бөгөөд 2014 оноос Монголд тоолуур нийлүүлж эхэлсэн байна.
Дөрвөн жил гаруй хугацааны хамтын ажиллагааны үр дүнд ОХУ-ын "Арзамас" үйлдвэрийн хөрөнгө оруулалтаар ийнхүү усны хэрэглээг ухаалгаар хэмжигч тоолуурын телематик удирдлагын төв, угсралт тохируулга, засвар үйлчилгээний нэгдсэн төв нээгдэж өрхийн усны тоолуурыг алсаас хянах бүрэн боломжтой болж байна.
"Дэд бүтэц телематик” удирдлагын төвийн хяналтад багтаж байгаа стриж “Аква 1” ухаалаг тоолуурыг тавьсан айл өрхүүд гар утсанд суурилсан аппликейшны тусламжтайгаар ундны усны хэрэглээний мэдээллээ өдөр, сар бүр үнэгүй авдаг болж байна.
Лабораторийн нээлтийн гэрэл зургууд
Гэрэл зургийг mpa.mn
